Aeropuerto a ricibi avalancha di demanda pa e ciere recien debi na tubo kibra

ORANJESTAD – Desde e dia cu aeropuerto di Aruba a cera pa 24 ora dos siman pasa, e la haya un avalancha di ‘demanda’ di pasaheronan. “Nos ta maneha un volumen halto di email actualmente y ta trahando pa contesta denter di 7 dia di trabou” e aeropuerto a laga sa diahuebs riba su red social. “ Despues di entrega bo demanda, lo bo ricibi un contesta automatico cu ta confirma bo resibo” e mensahe ta sigui bisa. “Por fabor haci sigur cu bo reclamo ta inclui tur documento i recibo necesario. Nos ta procesando reclamonan den e pedido ricibi, cu pagonan cu ta tuma te ku 7 dia di trabou unabes revisa”. Aeropuerto a dicidi mientrastanto pa tene e periodo habri pa ricibi demanda, te cu 15 di November proximo esta tres luna. Demandanan despues di e fecha aki, no ta wordo ricibi mas. 

DEMANDA Y PLACA

Manera cu Noticiacla a raporta anteriormente, ora cu e suseso a tuma lugar, Aeropuerto su gerencia a notifica cu nan ta premira demanda di e.o. aeroliñanan cu mester a desvia pa otro destinacion debi na e ciere di e aeropuerto. Y como cu ta aeropuerto di Aruba a tuma e decision pa cera, ta nan responsabilidad pa cubri gastonan incuri. No tabatin un idea e momento ey cuanto demanda lo a drenta y cuanto placa finalmente esaki lo a costa aeropuerto. Pa e prome dia so, e gerencia a menciona e cifra di 100 mil florin na daño financiero, primordialmente den gasto pa pasahero pa rebook, hospedahe, alimentacion y piesa pa drecha e daño na un tubo cu a causa e problema e dia ey. Mientras cu seguro ta cubri daño fisico na persona, e gerencia a bisa cu nan tin cu wak con ta bay paga esaki. E minister encarga cu aeropeurto, Dangui Oduber a sigura na e portal aki e momento ey cu aeropuerto mes lo cubri tur gasto.