Na Corsou, despues di a nenga merdia: Atardi Corine Djaoen-Genaro a bai ku asiento di PNP

WILLEMSTAD - Corine Djaoen-Genaro a bai ku asiento di Partido Nashonal di Pueblo ayera tardi. Esaki a sosodé algun ora despues ku el a sali reunion na Kas di Pueblo ku lider polítiko i direktiva. Ounke ku for di mainta e rumor insistente tabata kore ku Djaoen-Genaro a entrega su karta di retiro na direktiva di PNP, ora el a sali reunion el a bisa ku e ta sostené su partido. E lider Polítiko di PNP ayera na trapi di gobernadó tambe a konfirmá ku PNP tei ku su 4 asientonan den parlamento. Sinembargo pa den oranan di atardi, sra. Djaoen-Genaro a disidí pa entrega su retiro for di PNP i a deklará su mes independiente den parlamento. Pues PNP a keda ku tres asiento. Noticiacla a risibí informashon no ofisial ku sra. Djaoen-Genaro tambe lo bai forma parti di gabinete Pisas II. E lo haña kartera di BPD, di su eks kolega Ornelio “Kid” Martina, i ku un famia di dje lo bira minister p’e kartera aki. Sinembargo na momentu ku sr. Sithree van Heydoorn, presidente di MFK a anunsiá ku gabinete Pisas II tin sosten di sra. Zita Jesus-Leito i KEM, no a bisa nada di Djaoen-Genaro. Den elekshon di mart 2021, sra. Djaoen-Genaro a risibí 424 voto. Noticiacla a logra haña sra. Djaoen-Genaro na telefòn alrededor di 7:47 ayera nochi, pero sra. Djaoen-Genaro a pidi indulgensia pasombra e tabata atendé ku un famia di dje. E no por a papia ku nos e momentu ei. NOTA: Texto ta scirbi den Papiamento fonetico di Corsou