Tubo 'desconoci‘ bou tera na aeropuerto a skeer y rementa creando problema conoci

ORANJESTAD – Un tubo di 20 aña bieu cu ta conecta dos area cu otro, a rementa y kibra bou tera, causando tur problema cu aeropuerto Reina Beatrix a experencia diabierna. Un tubo cu segun gerente interino Jurgen Benschop, nan no tabata sa mes cu tabata existi bou di tera. Benschop a sigura cu no ta trata di falta di mantenimiento, y cu simplemente e tubo a kibra. Ta trata di e asina yama ‘main chiller pipe’, cu ta e unico tubo cu ta suministra awe di un edificio pa otro, pa e airconan, a skeer y rementa. Esaki a causa cu awa a keda basha afor y crea hopi problema. Despues cu a logra haya e problema, mester a cuminsa resolve esaki. Esey a inclui uso di varios pomp pa saca e awa exceso cu a sali for di e tubo. Door di falta di awa, tabatin presion cu a baha y pesey no por a fria e lugar grandi. 

CONSECUENCIA

Entre e consecuencia a nota cu e lugar a cuminsa bira mas calor, cu temperature cu a yega te 30 grado, y cu a pone parti di e vloer condensa y muha, haciendo esaki peligroso pa traspasa. Mirando e area grandi cu e aeropuerto ta wordo cubri pa e sistema, tabata dificil pa bin cu un plan alternativa pa remedia e situacion sin cu mester a resorta na e decision mas dramatico di cera aeropuerto completamente. 

KIBRA INFRASTRUCTURA

E situacion tabata asina serio y dificil cu pa yega na e base di e problema, mester a kibra e infrastructura completo rond di dje tubo en cuestion, djis pa yega na e origen. Mientrastanto a busca material y ekipo y aworaki tur ta in place, y ta trahando riba dje. Ta premira cu dentro di algun ora, e problema ta resolvi y cu por habri aeropuerto bek pa 7or manera ta custumber, pa e operacion cuminsa bek.