4 mil pasahero a keda pega na Aruba of otro destinacion cu gasto inicial di 100 mil florin

ORANJESTAD – Un total di entre 3 pa 4 mil pasahero a keda pega diabierna sea purbando di yega Aruba of sali. Asina miembronan di management team di aeropuerto, lidera pa Jurgen Benschop a bisa diabierna atardi durante un conferencia di prensa na aeropuerto. E gastonan incuri pa e prome dia ta monta na mas of menos 100.000 florin cu ta primordialmente gastonan di alimento, bebida, e operacion cu mester a haci awe na ekipo y material pa por drecha ey fayo cu a surgi, Aisha Anthony, gerencia tambe a bisa. Anochi a cera cu ainda mas of menos 1000 turista cu no tabatin un lugar sigura pa keda, aunke cu Benschop tabatin siguransa cu prome cu anochi cera, tur turista lo tin un camber pa drumi aden. 

GASTONAN TA CORE PA AEROPUERTO

Benschop a splica cu ora cu a mira cu e trabounan tabata asina grandi, a opta e ora pa cera aeropuerto, pa evita cu mas pasahero/turista drenta y asina tin mas problema pa hospedahe. Esaki pasobra hopi liher a bira conoci cu hotelnan tabata yen y cu mas hende yegando Aruba, e lo a crea solamente mas problema di camber. Esey tabata e motibo primordial e ora pa cera e aeropuerto. Di otro banda, door cu aeropuerto ta esun cu a dicidi esey, tur gasto y responsabilidad ta cay pa aeropuerto. A manda un carta pa tur aeroliña informando nan cu aeropuerto lo cubri tur gasto di bookings, y e compensacion di F&B. Pero cu tur cos mester a bay via e aeroliñanan y no via pasaheronan individual.

MAS GASTO NA CAMINDA

Aeropuerto ta conciente cu awe tabata e prome dia y cu lo tin mas gasto na caminda. E prome dia tabata 100 mil mas of menos pero diasabra lo tin mas. Y esey ta sin conta e claim cu aeroliñanan por haci riba aeropuerto pa gastonan incuri pa ‘desvia’ pa otro destinacion y e consecuencia cu esey tin pa e aeroliñanan. Varios aeroliña a bay Corsou, otronan a bay Bonaire y San Juan Puerto Rico. Tur e gastonan eynan tambe, ta cay pa Aruba su aeropuerto. 

DIASABRA

E intencion ta cu pa diasabra mainta 7’or ora cu aeropuerto habri bek, cu mayoria di e pasaheronan cu ta pega awe, por regresa nan destinacion, ya cu por lo menos 9 buelo di aeroliña a planea pa recohe e pasaheronan aki tempran. Ta consiente cu no tur pasahero lo por bay bek y lo tin cu keda algun dia mas na Aruba. Diasabra mes tin 5 mil pasahero cu tin cu yega y bay, ademas di e 4 milnan cu ta pega.