Anochi a cera sin cu conoce solucion pa taxistanan

ORANJESTAD – Anochi a cera sin cu conoce solucion pa taxistanan. Despues di a acepta pa reuni cu un grupo di 5 taxista diamars merdia, prome minister Evelyn Wever a exigi si pa taxistanan desblokea e pasada pa aeropuerto mesora. Esaki a sosode, y e reunion a tuma lugar na Bestuurskantoor. Mes momento a haya ok pa e taxistanan en cuestion, envez di blokea caminda pa aeropuerto, blokea e caminda dilanti Bestuurskantoor. A yama un reunion extraordinario di conseho di minister, incluyendo minister Ursell Arends, pa atende e situacion urgente cu a surgi cual reunion a termina un 10 minuut pasa di 6. Y a keda pa minister Ursell Arends duna un conferencia di prensa riba e resultado di e reunion di e conseho di minister riba e tema di taxista. Pero a resulta cu diamars no tabatin mas conferencia di prensa, sino cu ta te siguiente dia, esta diaranson mainta 10'or, minister Arends lo a tene su conferencia di prensa. 

SOSTEN PA TAXISTA

Mes momento varios minister a publicamente mustra nan sosten riba rednan social, na taxistanan, incluyendo minister Dangui Oduber y Rocco Tjon. Esey ta pone e gabinete den un situacion hopi interesante, si mira cu algun minister di MEP, ta sostene algo cu colega di coalicion kier cambia. No ta conoci si por yama esaki un simple impasse, of si tin cu yame un ‘crisis’ interno entre MEP y RAIZ.