Corsou a conoce su di 6 caso di asesinato pa 2024. Un dominicano

WILLEMSTAD\ - Kaso di asesinato ayera un bia mas a dominá notisia di Kòrsou. Ta  trata aki e di 6 asesinato ku Kòrsou ta konosé pe aña aki. E echo a sosodé ayera alrededor di 5 or di atardi ora a mèldu na sentral di polis di un bashamentu di bala ku lo tabatin na Elmesstraat na Steenrijk.

Ora e promé patruya polisial di Punda a yega, a topa un hòmber ku vários perforashon di bala sintá den un SUV pretu na e lado di shofùr, i di lèn. Mesora e agentenan a pidi presensia di ambulans ku urgensia na e sitio.

Na yegada di e paramédikonan nan a konstatá ku e hòmber víktima ya no ta duna señal di bida i no por  a hasi nada mas pe.

E tim di reshèrshi i tambe TOD a presentá na e sitio pa sigui ku mas investigashon den e kaso. Por a tuma nota ku e polisnan di TOD a konfiská 6 huls na e sitio. Informashon no ofisial ku Extra a risibí ta ku e víktima ta un hòmber di inisialnan J.C. di 31 aña  di edat nasé Repúblika Dominikana i tin indikashon ku den pasado ya nan a yega di tira riba dje kaba.

E persona aki no ta biba den e bario, pero ku frekuensia por a mir’é den e bario. Testigunan a konta ku ta un outo koló skur lo mester a yega para den su banda i a lòs e tirunan ku konsekuensia fatal.

E víktima a risibí bala na e parti ariba di su kurpa.

Alrededor di mitar di 7 di anochi dòkter di polis a konstatá morto di e víktima.

Polis a konfiská e vehíkulo, algun kashi di bala i riba òrdu di fiskal di Ministerio Públiko a konfiská e kurpa pa mas investigashon.

Kousa di e tiramentu no ta konosí i investigashon den e kaso aki ta kontinuá. NOTA: Texto ta scirbi den Papiamento fonetico di Corsou.