BCA a dicidi pa baha e tasa di reserva obligatorio

ORANJESTAD - Conforme e tarea di e Comite di Maneho Monetario (CMM) pa evalua, determina y duna transparencia riba e accionnan di maneho monetario di Banco Central di Aruba (BCA), BCA ta comunica lo siguiente. Durante e reunion di 13 di juni 2024, CMM a dicidi pa reduci e tasa di e reserva obligatorio di 20,5 porciento na 19,5 porciento entrante 1 di juli 2024. Di e manera aki, e banconan comercial mester tene un balansa minimo na BCA cu ta igual na 19,5 porciento di e depositonan riba termino cortico  di nan clientenan. E decision pa baha e tasa di reserva obligatorio tabata basa primordialmente riba e reservanan adecua segun e puntonan di referencia cu BCA ta monitor. Ademas, inflacion tabata modera, y e tasa di crecemento di credito (excluyendo incidentalnan) tabata relativamente abou. 

E CMM a considera e siguiente informacion y analisis den su deliberacion.

Reservanan oficial y internacional a crece te cu 17 di mei, 2024

E reservanan oficial (incluyendo cambio den revaluacion di oro y divisa) a expande cu Afl. 268,6 miyon si compara 17 di mei 2024 cu 29 di december 2023. E reservanan di divisa na e banconan comercial a subi cu Afl. 7,6 miyon durante e mesun periodo. Consecuentemente, e reservanan internacional (incluyendo cambio den revaluacion di oro y divisa), cu ta consisti di e reservanan oficial di BCA y e reservanan di divisa na e banconan comercial, a aumenta cu Afl. 276,2 miyon. Tumando e crecementonan ya menciona na cuenta, e reservanan oficial y internacional a suma Afl. 2.914,3 miyon y Afl. 3.338.3 miyon, respectivamente riba 17 di mei 2024 (Grafico 1). 

Sostene un nivel adecua di reservanan ta esencial pa mantene e tasa di cambio fiho entre e florin Arubano y e dollar Mericano. Den e cuadro aki, reservanan oficial a registra 16,0 porciento riba e nivel minimo adecua segun e metrico ARA di FMI (Tabel 1). Ademas riba 17 di mei 2024, e reservanan internacional a cubri 6,9 luna di pago riba e cuenta coriente. Teniendo cuenta cu esaki, reservanan internacional a keda ampliamente riba e rekisito minimo di tres luna. E pagonan riba e cuenta coriente di e balansa di pago ta consisti, entre otro, di pagonan pa importacion, pagonan di interes na inversionistanan stranhero y transferencianan pa exterior manera placa manda afo door di trahadonan stranhero.