Union Europeo no ta reconoce resultado di eleccion di Venezuela

BRUSELAS - Union Europeo lo no acepta e resultadonan di eleccion na Venezuela te ora cu tur voto a wordo conta. Hefe di politica exterior di UE, Josep Borrell, a bisa esaki den un conferencia di prensa.

E comision electoral oficial di Venezuela a declara e presidente actual Maduro e ganador di e eleccionnan diadomingo ultimo. Segun e comision, e socialista Maduro a haya 51 porciento di e votonan y por cuminsa cu su di tres periodo como presidente. Oposicion a ricibi 44 porciento di e votonan, segun e comicion electoral, pero e conteo no a wordo haci publico.

Oposicion ta bisa cu e resultado aki ta incorecto. Segun e partidonan di oposicion, multiple encuesta y conteo ta proba cu nan candidato presidencial conhunto, Edmundo González, ta e ganado real di e eleccionnan; e lo a ricibi 70 porciento di e votonan. Oposicion a pidi conteo for di varios centro di votacion cu lo a mustra cu González tabata significantemente dilanti.

Borrell ta bisa cu e comicion electoral a declara victoria pa Maduro aunke solamente 80 porciento di e votonan a wordo conta. E ta yama e conteo di oposicion un “motibo adicional pa no acepta e resultadonan” y ta bisa cu e resultadonan di eleccion mester wordo comproba completamente y independientemente.

E invitacion di e comision electoral pa UE pa permiti observadornan pa e eleccionnan a wordo retira. Union Europeo ta considerando posibel siguiente pasonan unabes cu e resultadonan completo ta disponibel. No ta conoci ki tipo di pasonan esakinan por ta.

COMISION ELECTORAL TA FABORECE MADURO

E Organisacion di Estadonan Mericano (OAS), un sociedad di 35 estado riba e continente Mericano, tampoco no ta reconoce e resultado. Segun e organisacion, e accionnan di e comision electoral ta proba cu e ta den man di Maduro.

Presidente Argentino Milei y e ministro Colombiano di Asuntonan Exterior, entre otro, a expresa nan duda riba e resultado di e eleccionnan, mescos cu e secretario Mericano Blinken.

Venezuela a bandona OEA na 2017 pasobra presidente Maduro tabata rabia riba presion di varios pais pa libera presonan politico y tene eleccion. AOS ta teniendo konsultanan di emergensia awe na Washington tokante e resultadonan di elekshon.

Manifestantenan a wordo ataca

Manifestantenan a subi caya den varios stad pa protesta e resultadonan di eleccion, cu manifestantenan y polis ta bringa. Segun organisacionnan local di derechonan humano, diesun persona a muri.

Despues presidente Maduro a dicidi di laga ehercito y polis patruya den e area pa evita mas disturbio. Agencia di noticia Reuters ta skirbi cu segun testigonan ocular, manifestantenan a wordo ataca pa polis na algun luga.