Bancarota di JetAir i United Caribbean Airlines B.V ta definitivo

WILLEMSTAD - E dos kuratornan ku ta atendé ku bankarota di United Caribbean Airlines B.V. i JetAir Caribbean B.V., ku ta operá huntu bou di nòmber JetAir, a disidí di hala den e opheshon di bankarota kontra dje kompania United Caribbean Airlines B.V.. T’asina despues di e desishon di korte di bankarota di e dos kompanianan dia 18 di yüni último, e kuratornan a bai den opheshon kontra di bankarota di United Caribbean Airlines B.V. a pensa ku por salba e kompania aki, i asina lo por tabatin un “doorstart”. Siman pasá djaweps korte a trata e prosedura di opheshon di e kuratornan kontra e bankarota di United Caribbean Airlines den korte. Ayera e kuratornan ku ta atendé e bankarota di United Caribbean Airlines B.V. a hala esaki aden. Pues awor ámbos bankarota diktá kontra JetAir i United Caribbean Airlines B.V. ta definitivo. E kuratornan por sigui atendé ku bankarota dje kompania manera e prosedura normal. E kuratornan no ta mira ku tin interes mas pa nan opheshon kontra e bankarota di United Caribbean Airlines B.V. por keda, i p’esei a hala e opheshon aden. Esaki ta nifiká ku definitivamente e pasaheronan a keda ku nan ticket den man, sin por hasi nada. Paso den un proseso di bankarota e kuratornan ta purba ku e entrada ku tin den e kompanianan i ku benta di propiedat di e negoshi, pa paga debenan. Pero manera ta konosí promé minister Gilmar Pisas a indiká despues di e bankarota, ku kuentanan di e kompania ta bashí. No tin sèn.

Dia 13 di yüni último, JetAir a entregá petishon di bankarota, i dia 18 yüni korte di promé instansia a deklará bankarota di United Caribbean Airlines B.V. i JetAir Caribbean B.V., ku ta operá huntu bou di nòmber JetAir. Korte a nombra sr. C.M. van Liere i sr. R.J. Vriezen komo kuratornan. JetAir tabata ofresé vuelonan den Karibe i Suramérika. JetAir a kuminsá su operashonnan na novèmber 2019. Pero Covid-19 a dal e kompania. Durante e desishon di korte di 18 yüni último, a bin dilanti ku ya den e promé kuater lunanan di 2024, JetAir ta konta ku un pèrdida di alrededor di Naf 2.000.000. P’esei JetAir a disidí pidi su propio bankarota. E kuratornan a bai opheshon kontra bankarota di United Caribbean Airlines B.V. pasobra lo tabatin kompanianan lokal i internashonal interesá pa sigui ku JetAir, p’esei gobièrnu a pidi e kompania di aviashon pa entregá nan lisensia. A “stashoná” e lisensia na ministerio VVRP. Sinembargo awor kuratornan a hala den e prosedura opheshon aden, paso no tin mas interes den esaki.