E Izquierda Uni ta gana eleccion, pero Francia ta menos uni cu nunca

PARIS - Pa sorpresa di tur hende, ni Macron, ni Le Pen, pero e bloke di izquierda ta gana e eleccionnan na Francia. Un impasse politico ta menaza pasobra nan no tin un mayoria absoluto.

Kiko e aliansa di ala robes aki ta para pe? Jean-Luc Mélenchon ta un di e caranan mas importante. Su partido radical di robes La France Insoumise tin puntonan di bista imprecionante. Por ehempel, nan kier bandona OTAN, reformá e UE completamente y baha e edad di penshun na 60 aña.

Nouveau Front Popculaire di Mélenchon a ricibi mas tantu voto, casi un tercera parti di e total. Esaki ta trece e bloke di izquierda na 188 asiento, segun e ultimo cifranan. Macron su Ensemble sorprendentemente a logra keda dilanti di Rassemblement National (RN). Aunke ambos partido a ricibi mas o menos un cuarto di e votonan, e sistema di districto ta duna e partido di Macron 161 asiento y RN ta termina cu 142.

Mélenchon no ta sin kcontroversia. El a aproba e aneccion Ruso di Crimea y a wordo acusa di anti-semitismo. E tin 72 aña di edad, pero hopi popular bou di hobennan. Esaki ta principalmente pa motibo di su actitud pro-palestino y su posicion di migracion: tur hende tin derecho riba asilo. Pa e motibunan aki, e tin hopi sosten tambe den e banlieues, e suburbionan di stadnan grandi. Emmanuel Macron ta y ta keda presidente. Cu e resultado aki e mester nombra un prome ministro nobo. Normalmente esaki ta e lider di e partido cu tin mayoria absoluto den Parlamento. Pero despues di e eleccionnan di ayera, tur bloke ta leu for di e mayoria absoluto ey. Esey ta un situacion hopi inusual pa Francia.