Un total di 9 partido a inscribi pa eleccion parlamentario nobo di St Maarten

PHILIPSBURG -  Un total di 9 partido a inscribí dia 2 juli último pa partisipá na elekshon dia 19 ougùstùs awor na St. Maarten. Despues ku e koalishon di URSM DP, NOW i PFP a kai despues di apénas 17 dia, promé minister Luc Mercelina a pidi pa disolvé parlamento i yama elekshon nobo.

E entrega di lista òf “postulation day” manera ta yam’é na St. Maarten, a kana trankil. Partidonan kompañá pa aktivistanan a presentá na edifisio di parlamento kaminda mester a entregá tur dokumento nesesario pa asina por partisipá na elekshon.

E 6 partidonan ku ta aktualmente representá den parlamento, esta NA, UP, URSM, DP, NOW i PFP tur lo tin partisipashon direkto den elekshon. Tin 3 partido ku no tin asiento i ku mester pasa den e proseso di sosten di lista.

Ta trata di partidonan SAM, OMC i ECE. Ayera mes e proseso di sosten di lista a habri i pa atardi 3’or ya kaba SAM i OMC ku 185 firma i 207 firma respektivamente a logra haña e kantidat di firma nesesario pa por partisipá na elekshon.

E partidonan kada unu mester di mínimo di 144 firma pa sosten. ECE a logra solamente 23 firma. Awe ainda por pasa i firma lista.

Reforma elektoral ta un di e puntonan di diskushon prinsipal durante e kampaña elektoral aktual. Partidonan di koalishon ta tilda e proseso di formashon ku a dura bastante largu kompará ku loke a kustumbrá kuné na St. Maarten komo motibu pa kaida di e koalishon.

Esaki a lansa insertidumbre riba stabilidat di e koalishon. Un di puntonan ku partidonan ke atendé kuné den próksimo periodo di gobernashon ta un lei di screening pa kandidatonan pa bira minister. St. Maarten no tin un lei pero ta usa un dekreto nashonal ku ta data for di tempu di Antianan Hulandes ku algun aña pasá a hasi algun kambio den dje.

Tin sinembargo hopi espasio pa interpretashon di e dekreto nashonal aki i kada instituto ku ta enkargá ku un parti di e screening ta duna tambe nan propio interpretashon i asta ta amplia e base di screening riba inisiativa propio. Pa e motibu aki ke bini ku un lei ku ta definí mas mihó e proseso di screening ku ta duna tambe mas klaridat di poblashon di St. Maarten kiko e kondishonnan ta ku un kandidato mester kumpli kuné pa por bira minister i alabes hasi e proseso di screening mas efisiente.

Otro punto durante e kampaña elektoral aki ta e retonan ku produkshon di koriente ku St. Maarten ta pasa aden. Kompania di produkshon i distribushon di awa i koriente, GEBE ta mantené un skema kontinuo di “schakel” debí ku no tin sufisiente kapasidat pa produsí koriente na e nivel di demanda di pais. NOTA: Texto ta scirbi den Papiamento fonetico di Corsou.