Noticiacla a cumpli 10 aña treciendo noticia responsabel pa Aruba

Riba un fecha manera awe, pero 10 aña pasa, Noticiacla.com a bay ‘live’, ora cu e tempo ey minister di Telecomunicacion ing. Mike de Meza a primi e boton special durante un evento special na Divi Restaurant. Diez aña despues, e portal ta estableci como un di e portalnan di noticia mas importante di e isla y besindario. Aki, e pensamento di ‘bo no mester ta esun mas grandi, pa bo resalta’ ta valido. Esei no ta kita afo cu Noticiacla.com tin su mas di 30 mil siguidornan acumula durante e ultimo 10 añanan. Loke ta resalta, ta cu noticiacla ta sinonimo na noticia serio, veridico y confiabel. 

Hopi ta e comentarionan cu mi ta tende, cu ta bisami, ‘nos ta lesa tur, pero ora cu nos lesa Noticiacla, nos no tin cu busca pa sa si e noticia ta berdad’. Y mescos cu mi a haci ora cu e portal a celebra su prome lustro na 2019, mi ta haci mescos awor. Gradici e lectornan fiel, y sigur tambe e comerciantenan cu a para tras di e portal, aña aden, aña afo. Sin e sosten comercial, e portal no por funciona. Sin lector, e portal no tin validez. Y Noticiacla durante 10 aña largo a logra tur dos. 

Un di e temponan mas dificil sigur, tabata durante pandemia. Y si no ta pa e reputacion y credibilidad serio di e portal, mi no ta kere cu nos lo a ‘make it’. Esaki, pasobra durante pandemia, comercio a sufri hopi. Hasta e grandinan. Y aki ta unda cu e comerciante mester a scohe cuidadosamente unda e ta pone e poco placa extra cu e tin, pa gasta na publicidad. Durante e pandemia, Noticiacla a luci, a haya su caminda y tabata un di esnan cu comercio mas a sostene. Masha danki pa esaki. 

Durante e 10 añanan, tabatin momentonan unda cu a purba cierto proyectonan, manera noticia na ingles y hulandes. Ambos tabata bon producto, pero no tabata su tempo. Lo trece nan bek sigur si. E programa Noticiacla LIVE cu a keda lansa na 2017, tambe a conoce su cambionan radical, pa loke ta e aspecto visual y technico. Cuminsando cu un imagen basico, simple, te na su imagen super professional, cu cual e por competi cu cualkier canal internacional. 

Ora cu bo negoshi, bo baby, cumpli 10 aña, berdad esaki mester wordo celebra. Aki tambe a kibra cabez un poco, pero manera cu e portal ta conoci p’e, aki tambe a dicidi pa sigui e rumbo conoci pa e portal. A opta e biaha aki, pa un celebracion mas educativo. Y esaki no ta pa motibo financiero, sino pasobra e ta lo corecto. Tur hende, tambe nos siguidornan, ta gusta un bon celebracion,  cu e acostumbrado toast y ambiente. Esey semper por. Pero nos a scohe e biaha aki pa un otro caminda. Esaki den un forma di un presentacion gratis cu oradornan renombra, riba temanan relevante pa e portal. Esaki lo sosode mas leu den aña y lo keda anuncia na su debido tempo. E biaha aki, nos ta repasa visualmente e logronan di e portal, repasa e momentonan mas importante, y final, laga un grupo di persona local y internacional, duna nan pensamento y saludo pa cu e occasion aki. Tur lo por wordo mira durante curso di dia awe.  Kico por spera pa e proximo añanan pa Noticiacla? Manera semper Noticiacla a haci, lo tin cambionan, cu ta haci un diferencia. Mi ta pidi bo keda pendiente pa e cambionan aki cu lo keda introduci na su tempo. Pa awor, mi kier termina, gradiciendo Todo poderoso pa a dunami e forza cu mi team pa por a guia e portal aki pa 10 aña largo, ABO e lector cu ta esun pa ken nos ta traha tur dia, y comercio, cu aña tras di aña, a deposita su confiansa den nos. Pa boso tur, un miyon di danki!. NOTA: E potret ta momento di lansamento di e website pa e tempo ey minister di telecomunicacion Mike de Meza riba 2 di juli 2014.