NHC: Beryl por drenta Caribe como horcan categoria 4

MIAMI – Beryl a converti su mes rapidamente den un horcan peligroso di categoria 3 diadomingo mainta y ta premira cu prome cu e drenta Caribe dialuna marduga, cu e lo aumenta te na categoria 4 si no ta mas. E ‘bon’ ta cu e no ta ‘mustra’ un menasa directo pa islanan ABC, unda cu nos por spera solamente falta di biento y ola grandi. Lamentablemente e destino pa varios isla den su caminda, ta mustra hopi mas pio y ta teme pa nan. E horcan lo ta ubica panort di Aruba diamars ora di merdia.

E UBICACION

E ubicacion diadomingo mainta di Beryl, tabata 570 km oost zuid oost di Barbados, cu ta e marca cu Aruba ta usa pa prepara pa un situacion asina. E forza di biento ta 195 km, y ta subiendo rapidamente. E ta moviendo direccion west cu velocidad di 33 km pa ora.