Awe gobierno di Corsou lo wak kico por hasi pa biaheronan perhudica di JetAir

WILLEMSTAD - Biaheronan perhudiká di JetAir ta buskando empatia serka gobièrnu. P’esei ayera nan a bai tantu ministerio di finansa serka minister Javier Silvania i despues na Forti serka promé minister Gilmar Pisas.

Ayera mainta tur biahero ku a haña mail di JetAir ku ta kanselá tur buelo i ku no ta duna sèn pagá di ticket, a akumulá dilanti porta di JetAir na Snipweg. Polis a presentá pa plakia e situashon. E biaheronan no a haña un kontesta satisfaktorio, djis despues ku a bira konosí ku e kompania di aviashon a bati bankarota. Ta hopi hende a keda perhudiká manera 5 ekipo di softball di Kòrsou ku mester sali e dianan aki pa un torneo grandi na St. Maarten; tambe tin grupo grandi di 75 hende ku mester bai fakansi Colombia, i asina tin mas dje tipo di historianan tristu aki di biahero ku a hinka nan sèn den JetAir. Un señora ku su ticket den man a deklará ku te djaluna atardi ora el a kumpra ticket, a garantisá su persona ku buelonan ta kontinuá normal.

E biaheronan a disidí ku ta bai serka minister di finansa Javier Silvania pa buska un “solushon”. Un señora ku a fungi komo bosero dje biaheronan a indiká ku nan a bai serka minister Silvania pa haña oido, i pa gobièrnu tin empatia pa nan ku a keda perhudiká. Pero na ministerio di finansa a manda e grupo aki pa Forti, kaminda promé minister Gilmar Pisas a reuní ku 6 persona ku ta representá e grupo di biaheronan.

Promé minister Pisas a duna di konosé ku e situashon ta mas difísil pa gobièrnu ora un lugá sera i mester buska solushon. Dor di bankarota, JetAir tin kurator ku ta hasi e situashon poko mas difísil. Promé minister P a informá e grupo ku awe djárason ta dia pa e seshon di Konseho di Minister, kaminda tur minister lo ta presente, i aki lo wak kiko por hasi. Pisas a bisa asuntu di charter avion ta difísil. Lo wak otro solushon. A pidi e grupo di 6 persona pa regresá Forti awe djárason, kaminda huntu ku otro minister ta wak kon por yuda aliviá situashon.

Pisas no ta komprondé kon den mundu di aviashon, awor ku turismo ta floresé, e kompania di aviashon lokal ta bati bankarota. E ta lamentá ku ni trahadónan tabata sa dje situashon. Tambe ora un kompania lokal bati bankarota preis di ticket ta bai subi i perhudiká esnan ku ke biaha. Si JetAir a bati bèl, gobièrnu lo a wak kiko pa hasi. Pero e kompania lokal no a bin serka gobièrnu, i nan a dal porta sera. Ta bai bringa internamente pa wak pa e hendenan perhudiká haña nan sèn. Esnan pegá afó tambe ta wak kon pa trese nan isla”, ta loke ku promé minister Gilmar Pisas a trese dilanti ayera. NOTA: Texto ta scirbi den Papiamento fonetico di Corsou.