UNHCR: Un di cada 5 habitante di Aruba ta un refugiado

ORANJESTAD – Aruba ta presidi un lista remarkable di Nacionan Uni pa loke ta e organisacion di refugiado UNHCR, esta cu per capita, e isla tin e cantidad mas grandi di refugiado na mundo. Asina e portal di noticia Hulandes NOS ta raporta awe. Mas specifico, di cada 5 habitante, uno ta un refugiado, debi na migracion forza. Asina e rapport Global Trends 2023 di UNHCR ta raporta awe. Corsou tambe ta den e top 5, pero na di 4 lugar. Eynan, 1 di cada 13 persona ta un refugiado.  

CANTIDAD RECORD

E cantidad di hende cu ta huy na mundo, a alcansa cifranan record, e articulo ta sigui bisa. E cantidad di persona cu ta huy mundialmente, ta 117 miyon. Aña pasa esey tabata 110. Debi na e conflictonan na paisnan manera Sudan, Gaza yMyanmar, mas hende ta huy y tin necesidad di un solucion urgente. E cantidad di refugiado ta mes grandi cu e cantidad di ciudadano di Japon.  

REFUGIADO ECONOMICO

E hecho cu Aruba ta lidera e lista di Nacionan uni, ta bin debi na e 17 mil Venezolano riab e isla. Nan ta huy pa e disturbionan interno bou di mando di e presidente Nicolas Maduro, pa Colombia y Brasil, pero tambe pa e islanan Caribense di Reino Hulandes. E Venezolanonan ta refugiadonan politico  y hende cu ta huy pa  violencia pero tambe cu nan no por sobrevivi na nan pais. Nan por ta p.e. diabetic pero no por haya remedi pa esaki na Venezuela. Un escapatorio pa Aruba of Corsou ta ‘facil’ pa motibo di e distancia. Pero Corsou no tin un procedura di asilo, y tambe no ta reconoce e tratado di refugiado. Aruba si, pero ta wak e Venezolanonan como refugiado economico pa cual nan no ta bin na remarke pa proteccion. Ta pone cu e gran cantidad di Venezolano (segun e rapport y articulo) ta ilegal na Aruba. Nan no ta haya cobertura medico, enseñansa y trabou legal. Gobierno no tin un maneho activo di persigui nan, pero esun cu acidentalmente wordo gara, ta wordo deporta mesora. 

LEGALISA NAN 

For di sociedadnan civil y comercial, tin gritonan pa legalisa e potencial laboral Venezolano, pero segun e raportahe, esaki no ta dunando oido ainda. Noticiacla mester raporta si, di otro banda cu gobierno a introduci e maneho di Legal Pathway cu ta un forma pa legalisa un grupo grandi, sin crea problema extra acerca. Asina mes e frontera ta sigui cera, pasobra tin miedo pa un influx mas grandi di refugiado di Venezuela. Pero segun e articulo di NOS, e posicion cu Aruba tin riba e lista di UNHCR, ta indica cu e maneho ey di frontera cera, ta poco efectivo.