Glenbert Croes ta sigura cu e no ta implica den 'ningun asunto dudoso'

ORANJESTAD – Minister encarga cu e.o. DIMAS Glenbert Croes diamars merdia a confirma den un comunicado y video, cu enberdad diamars mainta a tuma luga un "inval" mainta trempan na DIMAS y Cocolishi, relaciona cu un investigacion amplio riba un posibel caso di corupcion entre otro na DIMAS y hendenan cu ta trahando na ministerio di integracion. Loke e mandatario no ta bisa den su comunicado, ta si tabatin un inval tambe na su cas maternal na cumana, mientras cu otro media si ta raporta esaki. Despues e la confirma esaki si cu nan a bishita e cas na Cumana, debi cu aki e fundacion di dje ta registra. E minister mientrastanto, ta sigura cu nan lo duna tur cooperacion pa cu e investigacion aki. 

MINISTER NO TA IMPLICA 

E minister ademas a bisa cu e ‘mester confirma, cu Minister di Integracion Glenbert Croes no ta implica den ningun asunto cu por ta dudoso’, pues mester compronde di su declaracion aki cu e ta sigura cu e no ta envolvi den e investigacion ak. E ta bisa tambe cu e la duna instruccion na tur departamento envolvi, incluyendo su mesun ministerio pa duna tur cooperacion necesario pa e berdad sali na cla, y cu por duna cuenta na pueblo di e rektitud di e proceduranan den e maneho cu gobierno ta hibando riba tereno di labor, energia y integracion. 

DESAFIO

Minister Croes a splica cu e desafionan aki semper bo ta encontra na momento cu bo purba di goberna un pais corectamente, mirando cu den pasado ya nan a purba di implica Minister den asuntonan incorecto. "Pa mi ta importante pa pueblo sa, cu mi ta sostene e investigacion aki, paso ta asina so nos por caba cu e corupcion cu tin den loke ta proceduranan di permiso, na unda hendenan cu mester di un permiso ta wordo hinca den situacionnan dificil pa por saca nan permiso" Minister Croes a expresa. 

MANEHO NA DIMAS

Segun e mandatario, Gobierno ta desea pa e maneho cu ta wordo hiba na DIMAS, y tur otro departamentonan, na unda hendenan mester acudi pa haya nan permiso, paso nan a cumpli cu tur rekesito, ta un maneho corecto y husto pa esnan cu a bin estableci nan mes na Aruba pa un miho bida. 

TA LAMENTA INVESTIGACION

E mandatario a indica cu investigacionnan asina ta di lamenta, pero cu e ta spera cu e investigacion aki tuma su tempo pa asina por saca afo tur esnan cu ta envolvi den e actononan aki, y alfinal lo mester wanta e cosecuencia. Ta solamente di e manera aki, lo por stop e corupcion aki cu ta afectando e ministerio di integracion, y nos pais en general negativamente. 

COMBATI CORUPCION

Un di e prioridadnan di Gabinete Wever-Croes, desde cu nan a drenta gobierno, ta pa combati corupcion segun e mandatario, y pa Minister Glenbert Croes esaki no ta un excepcion. Un di e areanan cu semper a conoce corupcion ta den e departamento di permiso, y aki ta unda e investigacion amplio ta tumando luga.