Eleccion di St. Maarten a hala oficialmente pa mitar di augustus 2024

WILLEMSTAD - A hala fecha di elekshon di St. Maarten definitivamente. Gobernadó suplente di St. Maarten, Emiko Bird-Lake i promé minister, Luc Mercelina a firma ayera un dekreto nashonal nobo ku ta trese kambio den e fechanan pa elekshon nobo na St. Maarten

Despues ku gobernadó di St. Maarten a firma un dekreto nashonal pa disolvé parlamento i yama elekshon nobo pa 18 yüli awor a surgi diskushon riba e fecha di e elekshon. Entre otro partido nobo SAM di eks diputado, eks miembro di Konseho Insular, eks minister i eks parlamentario, Franklin Meyers  ta bisa ku no a kumpli ku leinan elektoral di pais.

E partido den un komunikado ta bisa di lo hasi tur loke ta posibel pa partisipá na elekshon benidero, pero ku mirando ku a yama elekshon pa 18 yüli awor e fecha di entrega di lista ta aki 1 siman, esta 31 mei. Leinan elektoral ta stipulá sinembargo ku partidonan polítiko mester haña 6 siman di tempu pa registrá pa elekshon i esaki no ta e kaso.

Konseho Supremo Elektoral di St. Maarten tambe a buska konseho riba e punto aki i den un karta siman pasá pa promé minister demishonario, Luc Mercelina ta proponé pa posponé elekshon pa asina kumpli ku lei i sigurá ku ta kumpli ku e proseso elektoral i e término ku partidonan polítiko tin pa registrá pa elekshon. E fechanan nobo ku ta proponé ta ku ta sera e registro di votadó dia 2 yüni, último fecha pa partidonan polítiko registrá pa elekshon ta bira 17 yüni, fecha pa entregá lista ta bira 2 yüli, fecha pa elekshon ta bira 19 ougùstùs i parlamento nobo di St. Maarten lo tuma asiento dia 20 sèptèmber.

Den e dekreto nobo ku a firma djaluna 27 mei ta ofisialisá konforme e proposishon di Konseho Supremo Elektoral ku elekshon ta tuma lugá awor 19 di ougùstùs. Esaki ta enserá ku entrega di lista ta tuma lugá riba 2 yüli i e parlamento nobo lo tuma asiento 20 sèptèmber awor.

E situashon polítiko na St. Maarten rondó di elekshon nobo ta tenso i tin indikashon di diferente moveshon di kandidatonan di un partido pa otro. Presidente di partido United People’s (UP) party, Tamara Leonard a entregá su retiro i segun informashon verídiko ku ta sirkulá e lo djòin filanan di partido nobo SAM.

Tin posibilidat asta ku lider polítiko di UP, Omar Ottley ku durante elekshon 11 yanüari último a resultá e polítiko mas popular di St. Maarten tambe por djòin partido SAM. Den partido National Alliance (NA) tambe lo tin bastante tenshon i segun informashonnan ku ta sirkulá a surgi un pleitu formal riba liderazgo durante último reunion di partido.

Sekretario di estado, Alexandra van Huffelen ta di bishita den Karibe i a indiká ku e lo hiba deliberashon ku gobièrnu demishonario di St. Maarten riba entre otro situashon polítiko na St. Maarten. Tambe Van Huffelen lo deliberá riba proyektonan grandi manera ehekushon di pakete di pais, rekuperashon despues di orkan Irma i konstrukshon di un prizòn nobo.

“Mester wak pa no surgi tardansa i ku e medionan finansiero Ku Hulanda a pone disponibel no ta disparsé pasobra no a hasi uso di nan”, e sekretario di estado a bisa. Van Huffelen ta inisiá su bishita na Aruba kaminda e lo  partisipá entre otro na e konsulta ku e tres gobernadornan di Aruba, Kòrsou i St. Maarten. Esaki ta un konsulta regular, periódiko, ku ta formalmente inkluí den e reglamentu di gobernadornan. NOTA: Texto ta scirbi den Papiamento fonetico di Corsou.