Aruba y Hulanda a haya otro y lo firma rijkswet cu ta diferente cu RAFT

ORANJESTAD – Premier Wever Croes na nomber di Gobierno di Aruba y Secretario di estado Hulandes Alexandra van Huffelen pa Hulanda a yega na un acuerdo pa loke ta supervision financiero, pa medio di un ley di Reino, pero diferente cu esun inicial cu ta e RAFT. Prome minister di Aruba Evelyn Wever Croes a confirma esaki pa noticiacla diabierna mainta. Segun e prome mandatario a splica Noticiacla, tabata riba su iniciativa cu a cuminsa e negosacion pa e alternativa aki, cu segun su palabranan, ‘ta miho cu e RAFT original y ta beneficia Aruba mas cu nunca’. Secretario di estado Hulandes Alexandra van Huffelen a bay di acuerdo cu esaki, pero palabra tabata na gabinete demisionario Rutte   si nan tambe lo a bay di acuerdo. Y awe mainta Conseho di Minister a aproba e proposicion. 

DIFERENCIA ENTRE E LEY NOBO Y RAFT

Segun prome minister Wever, tin algun diferencia importante compara cu e RAFT. Entre nan cu e RAFT lo mester a reemplaza e LAFT actual, mientras cu den e acuerdo aki, tin un tarea importante pa e Rijkswet y e LAFt. Ademas manera ta custumber di un rijkswet ‘regular’, practicamente no por sali di esaki. Den e caso aki, a scrap e pida ey y lo bay papia riba un exit mas cla y un asina clausula di vencimento (verval bepaling). Y tambe cu e RAFT tabata traha, teniendo cuenta cu e asina yama COHO, segun e prome mandatario, sowieso esey mester cambia. 

DEAL PA INTERES

Pero porta loke ta mas beneficioso pa Aruba, segun e prome mandatario, ta cu no solamente lo haya interes abou pa e debe di Covid, sino tambe riba otro debenan existente. “Pues e interes cu nos ta paga tur aña lo ta hopi menos”. E prome minister di Aruba ta considera esaki como tal, un game changer pa Aruba. 

APROBACION DI PARLAMENTONAN

A splica mas aleu cu e acuerdo aki ta uno na nivel di gobierno. Ademas e ta un acuerdo den liñanan grandi. E proximo paso ta cu lo bay traha awor riba e rijkswet. Y e rijkswet mester wordo aproba pa e parlamentonan di tanto Aruba como Hulanda. E intencion tabata pa awe den curso di dia e prome minister informa parlamento di Aruba. 

E INTERES

Pa loke ta e interes, mesora despues cu tanto Hulanda como Aruba firma e acuerdo, e interes cu Aruba tin cu paga, ta baha di 6.9% na 5.1%. Despues cu e rijkswet bin na vigor, e interest ta bira mesun cos cu Hulanda ta paga, plus 0.2%, cu aworaki ta total 3.4%.