Gotopo: Prolongacion di cierre frontera cu Venezuela ta un medida absurdo

CARACAS – E medida di prolongacion di ciere di frontera cu Venezuela, door di gobierno di Aruba, ta un medida totalmente absurdo. Asina e vice presidente di La Camara de Comercio y Turismo de La Vela de Coro, Juan Gotopo a bisa Noticiacla diahuebs mainta. Manera ta conoci Aruba a dicidi dialuna atrobe pa prolonga e ciere aki cu 4 luna. “E medida di ciere di frontera tuma pa e gobierno di Aruba, ta parce nos un medida totalmente absurdo, ilogica y sin sinti”, Gotopo a sigui bisa. Segun Gotopo, si pone e asunto den balansa, e ta bay contra e interes di e propio Arubianonan. 

INTERES 

Segun Gotopo, e ta referi na esaki pasobra ta hopi cu ta e Arubianonan cu ta bin Venezuela, pa cuestion familiar pero tambe pa cuestion salud. “Nos tin informacion den actualidad cu gran parti di pasahero cu ta bin di Corsou, ta origina nan biahe for di Aruba pa Venezuela. Esey ta mustra nos e interes cu e Arubianonan pero tambe Venezolano tin pa tuma e coneccion aereo aki di nobo directo entre ambos pais”.

SITUACION POLITICO

E ta admiti cu e ciere di frontera a bin debi na un circumstancia politico na Venezuela 5 aña pasa. Sinembargo na mei di e mesun aña, gobierno Venezolano, a dicidi pa revoca e decision ey y habri e frontera aereo cu islanan ABC. “Pero tabata e gobierno di Aruba cu desde e momento ey, a bin ta prolonga e ciere cada 3 luna di e frontera aereo”. Segun Gotopo, esey ta preocupa nan, pasobra e por afecta e relacion aun mas den futuro entre Venezuela y Aruba, specificamente e area comercial y economico. 

TUMA EHEMPEL NA CORSOU

Segun Gotopo, Aruba mester tuma ehempel na gobierno di Corsou, cu tabatin un relacion hopi mas habri cu Venezuela y cos a bay hopi bon desde un aña caba, prome maritimo y algun luna atras, tambe aereo. “No tabatin ningun problema cu e yegada di Venezolanonan via e parti aereo, obviamente pasobra cada Venezolano cu kier biaha pa islanan ABC mester pasa den e filtro di embahada Hulandes na Caracas pa haya un visa” Gotopo ta bisa. Y esey ta e motibo principal pa cual e ta considera e decision actual uno absurdo cu Aruba ta sigui prolonga e medida aki.

IMPRESARIO HOLANDES

E ta mustra tambe cu desde cu a habri e frontera cu Venezuela, (aereo), Venezuela a ricibi inversionistanan y impresario Hulandes cu a bin Venezuela na e estado Falcon, en busca di inversion den e area hotelero como infrastructura portuario. E ta referi na un bishita recien tambe di e bishita pa cu e proyecto di ferry entre La Vela y Corsou.