Fin di siman aki gobierno nobo di St Maarten ta huramenta porfin

PHILIPSBURG-. Porfin tin un fecha tentativo pa e gobièrnu nobo di St. Maarten hura i asina tuma asiento. Esaki ta djaweps 25 aprel awor loke ta 2 siman lat ku formadó, Luc Mercelina a spera.

Dos dia despues di elekshon di 11 yanüari último partidonan URSM, DP, NOW i PFP a firma un deklarashon di disponibilidat pa traha huntu. Loke a sigui despues tabata un periodo largu di informashon i formashon.

E periodo aki a dura mas ku 3 luna loke no ta usual pa St. Maarten. Partido PFP den un komunikado di prensa ta konfirmá ku porfin e proseso di formashon a yega den e etapa ku ta trahando e dekretonan pa nombra e 7 ministernan nobo huntu ku e minister plenipotensiario i minister plenipotensiario suplente na Den Haag.

E kandidato pa promé minister enkargá ku Asuntunan General ta Luc Mercelina (URSM). Veronica Webster (URSM) ta kandidato pa minister di Salubridat Públiko, Desaroyo Sosial i Labor i Grysha Heyliger-Marten (DP) ta kandidato pa minister di Turismo, Asuntunan Ekonómiko i Telekomunikashon.

Marinka Gumbs (DP) ta kandidato pa bira minister di Finansa, Raeyhon Peterson (PFP) ta kandidato pa bira Minister di Bibienda Popular, Planifikashon Urbano i Medio Ambiente, Christophe Emmanuel (NOW) ta kandidato pa bira minister di Edukashon, Kultura, Hubentut i Deporte i Lyndon Lewis NOW) ku ta kandidato pa bira minister di Hustisia.

Patrice Gumbs (PFP) i Gracita Arrindell (URSM) ta kandidatonan pa minister plenipotensiario i minister plenipotensiario suplente na Den Haag. Pa NOW Claudius Buncamper lo drenta parlamento pa remplasá Emmanuel, pa URSM Richinel Brug lo remplasá Mercelina i pa DP Viren Kotai lo remplasá Heyliger-Marten.

PFP ta bisa ku e proseso di screening tabata yená ku reto ku na hopi okashon tabata frustrante, inkoherente i no muchu kla. “Loke e proseso aki a mustra nos ta ku mester traha un lei dediká pa screening di minister”, e partido ta bisa.

Segun PFP ta di e forma aki so por eliminá e dudanan rondó di e base legal di sierto aspektonan di e screening i evitá ku sierto organisashon ku no tin un ròl den e derecho outónomo di St. Maarten pa forma un gobièrnu, ta presentá ku eksigensianan adishonal den e proseso di screening. Meta di e frakshon di PFP den parlamento lo ta pa presentá un proposishon di lei a base di e étika ku un kandidato pa minister mester kumpli kuné.

Di e forma aki PFP ke trese kambio den e normanan ku ta mantené segun propio interpretashon den e proseso di screening durante último 14 aña, pero ku nunka a komuniká na komunidat kiko esakinan ta eksaktamente. E frakshon ta primintí di lo keda tene públiko informá di e desaroyonan i ta pidi despensa pa e echo ku den lunanan ku a pasa no a hasi esaki manera a spera di e partido. NOTA: Texto ta scirbi den Papiamento fonetico di Corsou.