Hulanda dispuesto pa yuda paisnan den Caribe cu asunto di refugiadonan

WILLEMSTAD - Apesar ku asuntu di refugiado ta keda un responsabilidat outónomo di kada pais den Reino, gobièrnu Hulandes ta dispuesto pa yuda Kòrsou, Aruba i St. Maarten ku ayudo tékniko den kaso ku pidi pa esaki. Gobièrnu Hulandes ta enfatisá sinembargo ku ta importante ku ta habri diálogo ku organisashonnan no gubernamental pa optimalisá kolaborashon.

Asina sekretario di estado demishonario, Alexandra van Huffelen a bisa den kontesta riba preguntanan ku parlamentario pa partido VOLT, Marieke Koekoek. Van Huffelen ta trese dilanti ku e ta rekonosé e retonan ku Kòrsou, Aruba i St. Maarten ta topa kuné riba asuntunan ku tin di aber ku derecho humano i migrashon.

“Pero echo ta keda ku maneho di migrashon inkluso akseso na kuido médiko i protekshon di esnan sin dokumento ta keda un responsabilidat di kada pais den Reino”, Van Huffelen ta bisa. Dependé di deseo i nesesidat di kada pais Hulanda ta dispuesto pa yuda, van Huffelen ta kontinuá bisando.

Den 3 luna di tempu lo haña klaridat si Kòrsou, Aurba i St. Maarten a pidi ayudo. For di desèmber i yanüari a tene diskushon na nivel atministrativo ku organisashonnan manera Salú pa Tur i “Stichting Vluchtelingen”. Tambe a diskutí ku Human Rights Defence Curaçao riba e situashon spesífiko na Kòrsou ku migrashon i personanan sin dokumento.

Ta hasiendo esfuerso aktual pa enfoká riba kuido médiko pa personanan no dokumentá i pa mehorá maneho di migrashon, partikularmente na Kòrsou. Na mart sekretario di estado demishonario, Eric van der Burg (Hustisia i Seguridat) tabata di bishita na Kòrsou, Aruba i Boneiru ku e meta pa pone atenshon na e kontakto entre gobièrnu i organisashonnan no gubernamental.

“En general tin un bon kontakto entre e gobièrnunan lokal i e organisashonnan no gubernamental  pero por dal pasonan pa mehorá e kontakto aki i optimalisá e maneho, inkluso e aserkamentu pa trafikashon  di hende i smòkel hende, implementashon di maneho di migrashon i maneho di frontera”, Van Huffelen ta sigui bisa. Den e karta ku kontesta gobièrnu Hulandes ta indiká di ta konvensé ku organisashonnan no gubernamental por hunga un ròl importante den protehá i mehorá derechonan di personanan no dokumentá.

E komishon fiho di Hustisia i seguridat di parlamento Hulandes lo ta di bishita den Karibe di 18 pa 24 ougùstùs. Asuntunan relashoná ku refugiadonan lo ta riba agènda. 11 sèptèmber e komishon lo deliberá riba su eksperensianan durante e biahe pa Karibe. NOTA: E texto ta scirbi den Papiamento fonetico di Corsou.