Wever: Revitalisacion den area di Wilhelminastraat ta continua diaranson

ORANJESTAD – Despues di e prome parti di revitalisacion den area di  Colombusstraat y Wilhelminastraat na Oranjestad, esaki ta continua diaranson awor. Asina minister di Economia Geoffrey Wever a anuncia. E prome fase a dura hopi mas largo cu planea y como tal a termina bastante laat despues cu a encontra contratiempo serio. Esaki no a laga e comerciantenan den e area contento. Finalmente esaki a keda cla y e trabou final tabata bunita si. 

DI DOS FASE

E di dos fase, tin como meta pa transforma e area aki den e districto culinario "par excellence" di e ciudad, mehorando asina e estetica, accesibilidad y su funcionalidad tanto pa localnan como pa bishitantenan. E tin un enfoke particular riba e mehoracionnan planea, cual ta inclui creacion di mas espacio pa peaton, ampliacion di e area di parkeo pa acomoda e usuarionan, instalacion di mas ‘standplaats’ pa taxi, y miho iluminacion publico pa aumenta e nivel di siguridad den e area.

CERA WILHELMINASTRAAT PARCIALMENTE

Durante e periodo di trabou di renovacion, lo cera parcialmente Wilhelminastraat. Minister Wever a haci un yamada special pa cooperacion di tur esnan cu ta transita e caminda aki, como tambe pa e comerciantenan, pa facilita e realisacion di e obranan aki cu ta importante pa revitalisa e area. E proyecto no solamente lo mehora e infrastructura y estetica di e sitio, pero tambe ta spera di impulsa e economia local a traves di aumento di turismo y consumo den e negoshinan den e area.

"E proyecto di revitalisacion aki ta un testigo di e compromiso continuo cu desaroyo urbano sostenibel y mehoracion di calidad di bida di e ciudadanonan y bishitantenan di Oranjestad", segun Wever. Na su conclucion, ta anticipa cu e area di Columbusstraat y Wilhelminastraat lo por posiciona su mes como un centro vibrante culinaro y social cu lo atrae un “spectrum” amplio di hende, for di localnan te turistanan, contribuyendo significativamente na e dinamismo y diversidad cultural di e ciudad.