Retraso na Hulanda den proceso di renobacion di pasaporte debi na demanda halto

DEN HAAG – Varios municio na Hulanda tin problema cu demanda pa pasaporte Hulandes. E organo di biahe ANVR ta papia di un tormenta unda cu ta mira cu e tempo di espera pa un pasaporte a aumenta di 1 siman normal te 6 siman. E demanda grandi ta debi na reglanan cu a cambia na 2014. Te cu e aña ey, pasaportenan y id tabatin valides di 5 aña pero a cambia esaki na 10 aña. Esey ta nifica cu e aña aki diripiente un cantidad grandi di persona mester di sea un pasaporte of renobacion di ID. Aki na Aruba tambe lo por sinti e efecto aki di retraso. 

PASAPORTE DI EMERGENCIA

E ministerio di relacionan interior a alerta caba cu lo por a spera un aumento den demanda. Hopi municipio a dicidi di aumenta nan orario di servicio como medida pa por atende cu e situacion aki. Mes momento a alerta cu no tin sentido pa busca un pasaporte di emergencia ya cu esaki ta solamente pa emergencia y e no ta un alternativa pa no ricibi bo pasaporte regular na tempo. 

ARUBA

Aruba tambe ta keda afecta segun departamento di Censo. Por corda ainda aña pasa ora cu Censo a alerta tur hende na tempo di e situacion aki, debi na e ley cu a cambia na 2014. “E cantidad di peticion lo ta halto y pa es motibo nos ta pidi nos clientenan pa traha nan cita di antemano y no warda e paspoort caduca. Paspoort por dura 2 pa 3 siman pa yega for di Hulanda unda cu e ta traha. Censo no tin ningun influencia riba e periodo di espera pa esaki yega” Censo a bisa e tempo ey. “Pues por wak cu desde aña 2024 lo bira un periodo hopi druk y ta pidi nos clientenan pa tene cuenta cu esaki” e hefe di Censo, Sharin Luydens a sigura for di e biaha ey.