Wescot-Williams eligí presidente di Parlamento di St. Maarten

WILLEMSTAD - Lider polítiko di Democratic Party (DP), Sarah Wescot-Williams a keda ofisialmente eligí komo presidente di parlamento di St. Maarten pa e periodo parlamentario 2024-2028. E votashon pa Wescot-Williams tabata unánime.

Parlamento di St. Maarten a bini huntu den su promé reunion ofisial djasabra último despues di elekshon ku a tuma lugá 11 yanüari 2024. Esaki despues ku e miembronan nobo a kaba di hura serka gobernadó Ajamu Baly. For di djaweps siman pasá parlamento a kontrolá e kredensialnan di tur e parlamentarionan nobo.

Wescot-Williams a yama danki pa e konfiansa ku parlamento a pone den su persona. Tambe a eligí e promé i di dos vise presidente di parlamento.

Lider polítiko di partido NOW, Christophe Emmanuel ku 8 voto a keda eligí komo e promé vise presidente. Di dos vise presidente di parlamento a bira lider polítiko di partido PFP, Melissa Gumbs ku tambe a risibí 8 voto.

Wescot-Williams, Emmanuel i Gumbs ta forma huntu e presidio di parlamento. E presidio ta disidí huntu riba e rumbo parlamentario. Pues huntu ta tuma desishon riba por ehèmpel reunionnan ku ta pone riba agènda.

Gobernadó Baly den su diskurso promé di a hura e 15 miembronan nobo di parlamento a konsehá pa nan tuma nan tarea komo representante di pueblo na serio. “Bosnan no ta simplemente un polítiko, bosnan ta parlamentarionan awor. E diferensia chikitu aki ta trese responsabilidatnan grandi kuné pasobra awor bosnan ta representantenan di pueblo i mester traha na interes di pais i e poblashon kompletu, inkluso esnan ku ta di otro pensamentu”, Baly a bisa.

El a mustra e parlamentarionan ku ta awor e trabou duru ta bai kuminsá i a bolbe enfatisá ku interes general mester ta e punto sentral di tur toma di desishon tantu individual di un parlamentario komo ora ta tuma desishon den parlamento komo órgano. “Esaki ta konta tantu pa esnan ku ta sostené gobièrnu komo esnan ku ta den oposishon.”

Alabes Baly a mustra e parlamentarionan riba nan tarea ko-legslativo huntu ku gobièrnu, pero na mes momento tambe di ta esnan ku mester kontrolá e mesun gobièrnu aki. “Esaki ta un privilegio i alabes un peso enorme. Un privilegio pasobra huntu ku gobièrnu ta karga e responsabilidat pa kumpli ku deseo di e pueblo di St. Maarten, pero e peso èkstra pasobra ta spera korektamente di e  parlamentario ku e ta kumpli ku e enkargo aki na un manera responsabel i semper ku e enfoke riba interes general.”

Promé di a hura e 15 miembronan di parlamento Baly a menshoná kuater punto fundamental ku mester sirbi komo guia pa tur parlamentario. Esakinan ta: integridat, lealtat, estado di derecho i interes general di e poblashon.

Despues di e akto di huramentu Baly a kompartí algun palabra final: “Apesar ku pa polítikonan por parse ku tur kos ta rondó di hasi polítika, esaki no ta e meta final. E meta final ta prosperidat di e poblashon di St. Maarten i sirbí e siudadanonan di e pais aki. Tin ta bisa ku salú no ta bini tur biaha di uso di medisina; mayoria biaha e ta bini di pas mental, pas den bo kurashon i pas di bo alma. E ta bini di amor i alegria. Relashoná ku esaki mi ta bisa: stabilidat no ta bini tur biaha di reforma elektoral; mayoria biaha e ta bini di e personanan den parlamento, personanan den gobièrnu i di hende en general. E ta bini di integridat i e amor pa St. Maarten i su siudadanonan.” NOTA: E texto ta scirbi den Papiamento fonetico di Corsou.