Barco crucero cu a pasa Aruba tambe, confrontando brote di diareah y sacamento pisa abordo

MIAMI – Un barco crucero cu tabata na Aruba recientemente ta confrontando un brote di diareah y sacamento pisa abordo. Ta trata di e barco crucero Queen Victoria di Cunard Lines. E barco tabata na Aruba riba Dia di Betico y a permanece na nos isla entre 7or di mainta te 6or di atardi. No ta nifica cu ta aki na Aruba e pasaheronan y tripulantenan a contrae e malesa aki. Pero, segun e informacion oficial di Centers for Disease Control and Prevention (CDC), e malesa tabata durante e biahe completo, pues por no por bisa sigur unda e malesa a wordo contrae. E barco a sali di Ft Lauderdale dia 22 di januari ultimo y a yega Aruba dia 25 di januari ultimo. Despues e barco a sigui pa e canal di Panama y awe ta west di costa di Mexico, na caminda pa Hawaii. En total 123 di 1824 pasahero a bira malo y 16 tripulante di 967 total.