DIP a sigura cu tur hende cu a haya kavel, a wordo yama tambe!

ORANJESTAD – Tur esnan cu a ‘gana’ un derecho pa un kavel pa carnaval 2024, a haya un yamada. Asina Directie Infrastructuur & Planning (DIP) a sigura riba nan pagina di Facebook diahuebs mainta. Esaki debi cu tabatin hopi comentario riba rednan social y mas bien preocupacion di hende cu si nan a wordo yama si of no. “ Kavels Vondellaan y Kavels LG Smith Boulevard a ser jama 100% dia 17 januari 2024! Danki pa e pasenshi” tabata e mensahe cortico pero concreto di e departamento responsabel pa esaki. E aña aki a bin un cambio, relaciona cu regla y ley riba privacidad, unda cu no lo publica nomber y fam mas di hendenan cu a haya un kavel despues di e ‘rifa’ siman pasa. Esaki a crea un situacion di duda cerca hende cu si tur hende lo a haya nan yamada, y si esnan cu a haya nan yamada, realmente ta riba e lista. Hopi a cuestiona cu esaki ta kita e ‘transparencia’, ya cu no por controla ken tur en berdad a haya un kavel y cu tin e posibilidad cu ‘friends and family’ a haya algo asina. E ultimo aki ta speculacion, pero ta si un di e comentarionan cu a circula hopi riba rednan social.