Na Corsou, Aqualectra lo no paga dividendo, maske a hasi ganashi

WILLEMSTAD - Aqualectra (Integrated Utility Holding) lo no paga dividendo riba añanan 2019, 2020 ni 2021. E motibu prinsipal ta ku tabatin akumulashon di pèrdida den pasado i komo tal no ta responsabel n’e momentunan aki pa paga dividendo. Ademas segun sierto akuerdonan ku tin riba e repartishon tampoko ta duna motibu pa paga dividendo riba e añanan ariba menshoná. I den esaki por bisa ku e konsehero SBTNO ta di akuerdo. Asina ta bini dilanti den un konseho ku e entidat aki ta duna riba e posibel pago di dividendo dor di IUH. E ta splika ku, a base di e maneho di dividendo, e kondishonnan pa pago di dividendo ta enserá entre otro ku: por paga dividendo solamente si e resultado neto di IUH ta positivo den e aña fiskal en kuestion.

Mas aleu, pago di dividendo ta bai a kosto di un parti dje reservanan i mester ta den konkordansia ku statutonan di e kompania. E rasio di solvabilidat pa e fecha ei mester ta na 40% despues di deskontá e dividendo. Mas aleu el a splika ku, durante e periodo di 2019-2021 Aqualectra a sera kada aña ku un resultado positivo. Na 2018 e kompania di utilidat aki tabatin un resultado ampliamente positivo di Nafl. 37.5 mion. Pero durante e siguiente dos añanan e ganashinan a bin baha drástikamente na respektivamente Nafl. 13.9 mion na 2019 i Nafl. 5.6 mion na 2020. Na 2020 e ganashi a subi un tiki bèk na Nafl. 26.7 mion.

E ta splika ku, e efektonan dje pandemia di Covid-19 ta visibel den e sifranan di 2020. E medidanan ku gobièrnu a tuma e tempu ei (lockdown etc.) pa evitá ku e vírus lo a plama tabatin komo efekto ménos uso di awa i koriente i komo tal ménos benta tambe, i finalmente ménos ganashi pa Aqualectra. Di otro banda e regulador BTP a hasi korekshon di sierto komponentenan básiko i di kombustibel ku a keda pendiente den pasado. Dor di esaki aña 2020 a sera tòg ku un ganashi moderá di Nafl. 5.5 mion. Dor di e ganashinan durante e último añanan e posishon likides di Aqualectra a bin mehorá. E kapasidat propio tabata di Nafl. 364.9 mion na 2018 i el a subi na Nafl. 411.1 mion na 2021.

DIVIDENDO:

Pago di dividendo na akshonista tòg no ta posibel pa motibu di akumulashon di pèrdidanan di den pasado. E pèrdidanan ei lo mester ser kompensá promé ku ganashinan den futuro promé ku por papia di pago di dividendo. Por sierto, statutonan di e kompania ta bisa ku e kapasidat propio mester ta mas grandi ku e kapital depositá promé ku por papia di pago di dividendo.

Pa aña 2021 e kapasidat propio di IUH despues di agregá e resultadonan positivo a alkansá Nafl. 411 mion, miéntras ku e kapital di akshon ta di Nafl. 528 mion.

Finalmente SBTNO ta bisa ku e no tin ningun opheshon di peso pa bai kontra e proposishon di akuerdo ku e maneho di dividendo, esta ku pa añanan 2019-2021 lo no paga dividendo. NOTA: E texto ta scirbi den Papiamento fonetico di Corsou.