Wardacosta na Corsou sumamente contento cu comportacion di publico na “Fuikdag”

WILLEMSTAD - Bosero di Wardakosta Shalick Clement den un kombersashon ku Extra, a bisa  ku nan ta sumamente kontentu ku e komportashon di públiko ayera, na e tradishon di tur aña ku ta e famoso“Fuikdag”. Ta trata di un tradishon ku tur aña di nobo ta tuma lugá riba e promé djadumingu di aña na e laman di Fuik. Aña pa aña esaki ta bira aun mas grandi i e bia aki esaki tambe tabata e kaso. Segun sra Clement ,e aña aki tabatin un total di 150 pa 200 boto inkluso “sea do” ku ta un tiki mas tantu kompará ku aña nan anterior.

Pa sigurá ku kosnan ta bai segun regla, nan a pone un pòst na bahia di Santa Barbara ku ta e salida, pa asina kontrolá e botonan i nan dokumentonan.

Di tur e botonan 6 pa 8  a keda birá bek, pa motibu ku e kantidat di hendenan ku tabata den e boto, tabata sea di mas i no tabata kuadra ku loke tin pone den nan pèrmit, òf nan dokumentonan no tabata na òrdu. Mayoria di e boto nan aki tabata di plaser.  E boto nan tabata drenta entre 9 or pa 11 or di mainta na Fuik. Pa loke ta trata insidente, kasi no tabatin niun, segun Clement. Un persona so a kai for di un boto, pero e personanan ku tabata riba e boto mes a yud’e subi bek.

Mas aleu sra. Clement a bisa ku tabatin solamente algun boto di Boneiru ku tambe a partisipá. Na momento ku 5 or a bati, mayoria doñonan di boto a paga nan músika manera e akuerdo tabata. Despues mayoria boto a kuminsá bai, pa despues tiki tiki di un manera trankil tur sobra a sali pa nan destino te ora a bira bashí.  Pues un ‘Fuikdag “ 2024 super eksitoso  i sumamente trankil. Segun sra Clement e públiko a demostrá ku nan por sigui regla i komportá i esaki ta nifiká ku asin’aki por tin hopi “Fuikdag” mas den futuro. NOTA: E texto ta scirbi den Papiamento fonetico di Corsou.