Segun Camara di Comercio di Aruba mas di 1500 empresa nobo a registra

ORANJESTAD - Durante e aña aki Camara di Comercio ta raporta cu a registra un total di 1539 empresa nobo. Nos a observa mas registracion nobo cu aña pasa, pues na 2022 tabatin 1364 registracion nobo. Den totalidad tabatin 753 negoshi cu a wordo cancela of likida e aña aki, mientras cu aña pasa esey tawata 733 negoshi. Si haci un comparacion cu añanan anterior nos por observa lo siguiente:Nos por observa cu e cantidad total di negoshi ta aumenta di un manera constante for di 2018 te cu e aña aki. E tasa di crecemento ta generalmente positivo indicando un crecemento constante durante 2018 pa 2023. Sinembargo, e tasa di crecemento den total di companianan ta mustra un tendencia di baha pero ta keda positivo. Esaki ta indica un ritmo mas slow di crecemento den cantidad total di companianan. 

Den e cantidad di registracion di negoshi nobo pa e ultimo 5 añanan tin fluctuacion significante, pero por nota tur aña un crecemento compara cu e aña anterior, cu un piek na 2021 (25.7%) y un otro crecemento notabel na 2023 (12.8%). 

E porcentahe di cancelacion y likidacion ta fluctua entre e periodo di 2018 te cu 2023. Sinembargo por nota cu cancelacion y likidacion ta birando menos durante e periodo aki. E balornan negativo aki ta indica un reduccion den cancelacion y likidacion, cual ta sugeri cu menos negoshi ta sera nan porta.