Van Huffelen: Aruba y Hulanda a haya otro riba un LAFt ‘adapta’

DEN HAAG – Aruba y Hulanda a yega na acuerdo pa un LAFt adapta cu ta nifica cu supervision financiero pa Aruba ta garantisa den 2024. Den un entrevista cortico awe mainta, secretario di estado Hulandes Alexandra van Huffelen a confirma esaki. Mientras cu detaye specifico no a wordo duna, den un contesta specifico na Noticiacla, e secretario di estado a confirma si cu e tres puntonan cu Hulanda a pone como condicion na ultimo momento, tambe a keda incorpora den e ley ‘nobo’. Awor e ley ta bay Parlamento di Aruba pa e aproba esaki. Segun van Huffelen na Noticiacla, e la clarifica cu esaki ta algo cu Hulanda por ‘biba cune’ por lo pronto, pero cu e ta keda insisti cu mester di un Rijkswet, riba cual ainda no tin un acuerdo. Tambe e la clarifica cu ta e LAFt a keda cambia y no e protocol.