Mansur: Resultado electoral Hulanda ta deseo pa cambio radical

ORANJESTAD – “E resultado electoral na Hulanda sigur ta un momento pa reflexion” tabata e prome reaccion di lider politico di partido ACCION21 Miguel Mansur. Segun Mansur, mayoria di votado a scoge pa un gobierno di derecho cu un partido di derecho extremo esun di mas grandi. “Nos ta interpreta e resultado como un deseo pa cambio radical den con e pais ta wordo goberna, specialmente relaciona cu inmigracion. Nos ta lamenta cu Gabinete Wever-Croes II (MEP-RAIZ) a tira hopi oportunidad pa miho cooperacion y inversion fe Hulanda afor paso awor ta menos probabel cu lo haya algo miho”. Tambe sr Mansur ta bisa cu lo mester busca forma constructivo pa traha cu e gabinete nobo, te hasta si e ta consisti di partido(nan) cu lo kier mira e islanan sali fe Reino. “Nos ta spera cu na eleccion 2025 pueblo di Aruba tambe vota pa cambio radical y pone un fin na loke ya no ta trahando pa mayoria den nos comunidad”.