Zulema Dabian ta reemplaza Joselin Barroso na Washington fin di December 2023

ORANJESTAD – Manera cu Noticiacla a raporta for di mei di e aña aki caba, gobierno di Aruba a apunta sra  Zulema Dabian – Erasmus pa bira e proximo minister plenipotenciario na Washington. E ta un persona cu ta bin, riba peticion di partido RAIZ.  Dialuna Prome Minister a splica cu e posicion aki ta uno importante, mirando cu e funcionario aki, lo asisti Gobierno di Aruba y pueblo en general pa logra cierto metanan, manera señora Joselin Croes a haci durante su añanan como Minister Plenipotenciario na Washington. 

Señora Croes, durante su cinco añanan, como funcionario di gobierno pa representa Aruba, a logra hopi acuerdonan, cu ta di gran beneficio pa pais Aruba. El a organisa un encuentro virtual pa hende muhenan entrepreneur di Aruba y Corsou, hunto cu e consul general di Miami y demas stakeholdersnan, el a asisti Minister di Finansas y Minister President na reunionnan di IMF y World Bank, el a asisti hunto cu Prome Minister of cualkier Minister di Aruba, cu tabata presente, na  reunionnan di Asamblea General di Nacionnan Uni, el a yuda pa Aruba mantene un bon tier pa loke ta e TIP report y pa Aruba no wordo "downgraded" di tier, door di Merca, tambe el a yuda den renegociacion di e acuerdo entre Aruba y Custom Border Patrol na Washington, y el a logra sera acuerdonan di cooperacion cu diferente Universidad y institutonan educacional na Merca, dunando asina oportunidad na e studiantenan di Aruba, pa por bay haci nan stage eynan, tambe a logra yega na un acuerdo entre Gobierno di Aruba y Universidad di Aruba pa reduci e "tuition fee" y cambia esaki pa "in-state tuition", na unda e studiante Arubiano lo paga  "tuition", na e scolnan cu a yega na acuerdo cu nan,  manera un studiante mericano. Esakinan ta algun di e logronan grandi di señora Joselin Croes durante e cinco añanan cu e la fungi como Minister Plenipotenciario na Washington, y cu gobierno lo desea pa señora Dabian-Erasmus continua cu nan. 

Prome Minister a splica cu e procedura pa scohe un Minister Plenipotenciario nobo, a bay segun palabracionnan hasi durante formacion, cu partido MEP ta propone candidato pa e posicion na Hulanda y partido Raiz ta propone candidato pa e posicion na Washington. 

E maneho a cambia, y a keda dicidi cu pa e funcion na Washington, ta busca un persona cu experiencia y conocemento di relacionnan internacional, cu ya caba ta traha den gobierno. 

Basa riba esaki, a propone sra  Dabian-Erasmus, cu ta cumpli cu tur e rekesitonan, un persona prepara y cu e cualidadnan necesario pa por representa Aruba na Washington.

Señora Dabian-Erasmus a studia international relations na Hulanda, y a gradua na aña 2005. E ta trahando na Departamento di Asuntonan Economico y a fungi tambe como “part-time” docente na Universidad di Aruba.