Faltando 2 siman pa eleccion, ainda Omtzigt no sa si e kier bira premier di Hulanda

AMSTERDAM – Faltando apenas dos siman prome cu e eleccion pa Tweede Kamer na Hulanda, ainda e lider di e partido popular NSC, Pieter Omtzigt tin duda riba e posicion di prome minister. Esey e la confirma atrobe den e debate electoral di e canal di television RTL. Den e debate, e la bisa cu ainda e no sa den cua posicion e por ehecuta e programa di su partido miho. “Ora cu mi sali afo, mi lo bisa” e la contesta e moderador Fons Lambie. Esey kier men tambe cu e ta keda disponible. Riba un otro pregunta, e la sigura cu e ta den bon condicion pa por eherce e funcion ey si e haye. Na Hulanda ta custumber cu e partido cu resulta esun di mas grandi, produci e prome minister. Actualmente encuestanan ta duna Omtzigt un bon chens pa bira esun di mas grandi.