Ainda tin por lo menos 9 ambtenaar na cas ta cobra tur luna sin traha

ORANJESTAD – Ainda tin 9 trahado di gobierno na cas, ganando placa tur luna, sin cu nan ta trahando. Gobierno siman pasa a informa esaki, un dia prome cu tabatin reunion di RMR na Hulanda, pa demonstra cu nan ta cumpliendo cu un di e rekisitonan pa logra un acuerdo cu Hulanda riba RAFT y refinanciamento, esta baha gasto di personal. 

NA COMIENSO

Ora cu e gabinete actual di signatura MEP a sinta na 2017, tabatin 82 persona den e asina yama ‘overtolligheids pool’, cu ta un grupo di trahado cu ta sinta na cas, sin traha, pero ta wordo paga tur luna si door di gobierno. Sea a manda nan cas pasobra no tin confiansa pa traha cu nan, of un otro motibo. 

REDIRIGI

Ora cu e gobierno di MEP a sinta, a dicidi pa traha riba esaki mas activamente y reduci e number grandemente. Na 2022 a cuminsa un trayecto intensivo pa reintegra e trahadonan aki di e grupo menciona. Trahadornan por sea coopera, of haya un medida disciplinario si no haci esaki y haya nan retiro. Na final aworaki, tin 1 di e trahadonan en cuestion, cu ta deteni, uno ta AO, uno ta den un bataya legal, y e resto ainda ta pendiente. Na tur tin 9 trahado cu ta ‘cobrando’ sin traha. Tin algun cu tabatin mas di 12 aña ta na cas cobrando trankil y tabata te hasta broma cu esaki riba caya. E persona aki mientrastanto a fayece algun tempo atras.