Wever-Croes: Lo usa e 25.1 miyon extra ricibi na entrada den 2023 pa varios proyecto

ORANJESTAD - Dialuna anochi, durante un conferencia di prensa extraordinario di Gobierno di Aruba cu hopi fanfaria, prome Gobierno a informa comunidad di Aruba cu gobierno a ricibi un entrada adicional di 25 miyon, y cu esaki lo wordo usa pa varios proyecto reparti den varios ministerio. E mandatario ta sigura cu e suma extra ta ‘danki na maneho financiero estricto y responsabel’. Segun e mandatario, ta prome biaha den historia cu e presupuesto supletorio ta bin cu un surplus envez di un deficit. 

Segun e mandatario, cu e 25 miyon florin adicional, Gobierno por inverti den proyectonan importante pa pais Aruba. Durante e conferencia di prensa, cada minister tabata tin e oportunidad pa splica na kico e fondo adicional aki, lo bay wordo aplica.  

DESTINACION PA FONDO

Inversionnan

Cu e 25.1 miyon adicional di Presupuesto Supletorio 2023, Wever Croes a bisa cu ministerio di Asuntonan General tambe lo logra realisa algun proyecto. 

- Reemplaso di computer na Departamento di Recurso Humano cu lo yuda pa e funcionamento mas agil di e departamento. 

- Parlamento. E parti patras di e edificio di Parlamento lo wordo remodela completamente. Ta trata aki di oficinanan di Parlamento. Asina tambe Gobierno ta fortifica mas aun nos democracia di nos pais permitiendo tambe pa Parlamento traha den un edificio mas adecua. 

- Wilhelmina Brug cu actualmente ta den hopi mal estado, lo wordo drecha y remodela.

- Juliana Brug cu tambe ta den estado precario, lo wordo drecha y remodela. 

- Kadaster y DTI tambe lo haya atencion debido. 

- Lo asfalta camindanan cu tin mas prioridad y ta den mas mal estado, cu ta wordo frecuenta pa mas tanto hende y cu, segun e criterianan, ta den estado di peliger.