Diabierna Van Huffelen a ofrece Aruba refinanciamento na 6.9%

DEN HAAG - Ya cu Aruba ainda no a yega na acuerdo cu Hulanda pa loke ta refinanciamento di e debe di Covid, diabierna ultimo secretario di estado Hulandes Alexandra Van Huffelen a ofrece prome minister di Aruba Evelyn Wever Croes oficialmente refinanciamento na 6.9% pa e debe di Covid19. Asina e mandatario a informa Tweede Kamer den un carta dialuna ultimo (ayera). E la ripiti cu ainda no tin acuerdo cu Aruba riba un Rijkswet unda cu e supervision financiero ta wordo ancra di un forma duradero, y tampoco tin un LAFT (Landsverordening Aruba Financieeel Toezicht) adapta cu a drenta na vigor. “E situacion pues ainda no a cambia pa cu e reunion di 25 di augustus ultimo, pues mi a ofrece Aruba un refinanciamento di largo duracion contra un interes di 6,9% manera describi den mi carta anterior na Tweede Kamer” e mandatario a sigui bisa. “E acuerdo di prestamo a wordo discuti siman pasa na nivel di ambtenaar, cual despues dia 6 di oktober ultimo mi a ofrece na e minister president (Wever-Croes:red). E combersacion ta andando ainda” e mandatario Hulandes a finalisa bisando.