Dos homber a bira victima di un atraco na cas na Tanki Flip

ORANJESTAD - Diahuebs atardi pa 4:03 central di polis a wordo notifica di un atraco cu lo mester lugar na un cas na Tanki Flip.  Ta despacha patruya di polis na e sitio di e sucedido. Na yegada di patruya ta bin compronde di un di e victimanan cu un rato prome un hende homber cu ta papia spaño, bisti full na preto y cara tapa lo a trata na atracanan. 

E victima a splica polis cu e sospechoso tabata tin un arma di candela. E dos victimanan a bringa cu e sospechoso y na un momento un tiro a los. E sospechoso a bandona e sitio na pia . 

Ambulance a yega na e sitio pa asina brinda asistencia medico na e dos victima cu tabata tin sla na curpa. Atraco Team y polis technico y departamento di  slachtofferhulp tambe a presenta na e sitio pa haci nan investigacion como brinda sosten na e victimanan.

E sospechoso te cu ultimo informacion no a logra bay cu nada. Un rato despues patruya cu tabata rondiando y investigando e area a bin topa cu un bivakmuts poco pariba di e cas.  E caso aki ta den pleno investigacion

Pa Cuerpo Policial Aruba por resolve mas caso cooperacion y informacion di pueblo di Aruba ta hopi importante, pesey nos ta pidi si bo tin cualkier informacion yama nos tiplijn di Polis cu ta 11141. Nos ta garantisa cu bo ta keda anonimo.