Tweede Kamer lo vota tocante mocion pa ‘nulmeting’ den enseñansa naCorsou

WILLEMSTAD - Parlamento hulandes den siman di 26, 27 i 28 di sèptèmber lo vota tokante diferente moshon. Entre otro moshon tokante ‘nulmeting’ di enseñansa na Kòrsou. Esaki ta poné den agènda di parlamento hulandes. Manera ta konosí partido polítiko hulandes CDA no ta di akuerdo ku e manera ku Kòrsou a hasi investigashon pa e ‘nulmeting’ di enseñansa. Parlamentario Joba van den Berg tres luna pasá a entregá un moshon pa urgi Kòrsou pa hasi un nulmeting di nobo. E investigashon tin ku wòrdu hasí dor di un instansia independiente, asina Van den Berg ta skirbi den su moshon.

Sekretario di estado hulandes Alexandra van Huffelen (Relashonnan di Reino, D66) ta deskonsehá moshon. Van Huffelen den un rueda di prensa virtual ku prensa Karibense dia 22 di yüni, a splika: “Mi a deskonsehá e moshon i mi a splika miembronan di parlamento di Hulanda ku mi ta kontentu ku minister di Enseñansa di Kòrsou, Sithree van Heydoorn, ta den deliberashon ku direktivanan di skolnan relashoná ku e nulmeting. Mi ta wardando riba resultado di e deliberashon.”

Otro siman lo trata e moshon den reunion di parlamento hulandes. NOTA: Texto ta scirbi den Papiamento fonetico di Corsou.