Na Corsou, doño di radio, Orlando Cuales ta ganador di Premio Boeli van Leeuwen 2023

Na Corsou, doño di radio, Orlando Cuales ta ganador di Premio Boeli van Leeuwen 2023

Posted on 09/15/2023 9:48 am AST | Updated on 09/15/2023 9:53 am AST

WILLEMSTAD - Orlando Cuales lo haña e prestigioso premio Boeli van Leeuwen di e aña aki. Ta trata di un distinshon ku Gobièrnu di Kòrsou ta duna kada dos aña pa honra e legendario eskritor i pensadó kurasoleño aki. E premio ta keda otorgá riba e dia di natalisio di Van Leeuwen. Anteriormente Norman Moron a gana e premio prestigioso Boeli van Leeuwen di 2019 i promé ku esei tabata e periodista Mariano Heyden. Otro ganadornan tabata na 2009 Henny Coomans i Maritza Coomans-Eustatia. 2011 − Rose Mary Allen, 2013 − Tania Kross, Randal Corsen i Carel de Haseth, 2015 − Angela Roe.

Orlando Cuales no ta un persona ku mester di introdukshon i ta konsiderá un di e eminensianan den radio difushon ku a hasi su impakto den nos sosiedat den último dékadanan ku su bos úniko i opinionnan skèrpi. No por lubidá tambe su ekspreshonnan úniko durante transmishonnan di eventonan deportivo. Orlando Cuales ya tin 51 aña den radio.

Premio Boeli van Leeuwen ta un premio ku for di aña 2009, ta otorgá kada dos aña na un òf mas persona òf organisashon ku a alkansá prestashon intelektual ekselente riba tereno kultural, hurídiko, gubernamental, sosial òf periodístiko. E prestashon di e ganador mester ta unu ehemplar, e mester inspirá i habri bista di komunidat i e mester surpasá frontera di Kòrsou.

Banda di e Premio Boeli van Leeuwen ku a keda otorgá pa promé biaha na 2009, Konseho Kultural Kòrsou tin na su enkargo alabes Premio Cola Debrot. Premio Cola Debrot ta keda otorgá den un di e siguiente kategorianan: arkitektura, arte visual, baile, folklor, literatura, músika, teater òf siensia. Alabes Konseho Kultural a risibí e enkargo di e Premio Charlwin “Broertje” Marshall, un premio pa hóben i riba tereno kulinario.NOTA: Texto ta scirbi den Papiamento fonetico di Corsou. 

  • Powered by SETAR