Evelyn Wever Croes ta topa Mark Rutte y Alexandra van Huffelen na New York otro siman

DEN HAAG/ORANJESTAD – Premier Evelyn Wever Croes ta topa cu prome minister demisionario di Hulanda Mark Rutte y prome minister di St Maarten Jacobs na Nacionan Uni na New York. Mientras cu premier Hulandes oficialmente ta hiba discurso na Nacionan Uni y topa cu e secretario general Guterres, e prome ministernan di Aruba y St Maarten nan tarea oficial lo ta pa participa den eventonan ‘na banda’ dirigi riba enseñanswa, clima, liderazgo femenino y Small Island Developing States (SIDS). Tambe nan lo topa cu colegenan regional y instancianan di Nacionan Uni. Mayoria di e mandatarionan ta biaha entre diamars y diaranson otro siman, mientras cu e encuentronan ta entre e diaranson ey y diabierna dia 22 di September. Ultimo biaha cu nan a topa otro na New York tabata na september di 2021. 

MANDATARIO TA TOPA OTRO

E lo bira un encuentro interesante mirando cu aworaki tin e ‘tension’ entre Hulanda y Aruba riba tema di Rijkswet pa supervision financiero, y cu ta sigur cu e partidonan lo toca e tema eynan, aunke riba un nivel poco mas informal. Lo ta sigur cu e momento ey Aruba lo kier toca e tema cu prome minister demisionario Mark Rutte, durante e encuentro na Hulanda. Lo mira potretnan sigur entre e mandatarionan durante e bishita aki, y lo tin sigur hopi momento pa ‘foto-op’, cu sonrisa, pero esey no kier men cu e situacion riba e tema actual, ta uno resolvi. Ta e intencion pa e combersacionan entre Aruba y Hulanda continua y e intencion tabata fin di luna aki ora cu secretario di estado van Huffelen ta na e banda di laman aki, incluyendo di Aruba, pero e mandatario no ta bin Aruba mas sino e otro islanan si.