Tweede Kamer ta trata refinanciamento di debe di Covid19 awe pa islanan CAS

DEN HAAG – Awe merdia Tweede Kamer na Hulanda ta trata e revision di presupuesto 2023 pa por inclui e refinanciamento di e debe di Covid19 pa Aruba, Corsou y St Maarten. Durante e debate en cuestion, secretario di estado Hulandes Alexandra van Huffelen lo presenta e parti di refinanciamento. Oficialmente e mandatario a presenta esaki pa medio di un carta dia 25 di augustus ultimo.  

SIMAN PASA 

Manera ta conoci, siman pasa Van Huffelen a informa Aruba cu e ta habri pa un ley hybride pa loke ta e supervision financiero pa Aruba, aunke cu e RAFt (e ley di Reino) ta keda riba mesa ainda, contrario na interpretacion di cierto politico y media na Aruba. Alabez e ministerio BZK a confirma pa e portal aki cu a cuminsa e proceso pa e acuerdo di refinanciamento, basa riba un interes di mercado,  entre 6 y 8%, cu lo ta vigente te ora cu partidonan tin un acuerdo riba e RAFt. Si ta un concepto hybride of no, e realidad ta cu pa e proximo 2 aña sigur, Aruba lo mester paga un interes hopi halto cu lo consta e pais por lo menos 10 miyon extra.