Caso Avestruz ta bek den corte awe pa atende apelacion

ORANJESTAD – Abogadonan pa un total di 7 persona relaciona cu e caso penal Avestruz, mester presenta dilanti mesa berde awe tardi, den caso di apelacion. Ta trata di abogadonan pa e sospechosonan Benny Sevinger, Pieter Susebeek, Carlo Mansur, Ninosca Nuñez, Gabi Werleman y Curt Harms. Como cu esaki lo trata mas bien di un regiezitting, a compronde di e abogadonan cu e sospechosonan mes lo no ta presente den corte personalmente.   

LUNA DI SEPTEMBER

Mientras cu e regie zitting ta wordo trata proforma awe tardi entre 3’or y mei pa 5’or, no ta conoci ki dia e caso di apelacion mes lo tuma lugar. Ta premira cu esaki por ta den November of December. E caso original a dura 3 luna y e sentence a dura 4 luna prome cu esaki tabata conoci. 

KEN TA HACI KICO 

Tres di e casonan ta apelacion di Ministerio Publico, cu despues cu huez a dicta sentencia, a anuncia cu nan lo apela. Esey ta conta pa Benny Sevinger, Leoncita Arends y Pieter Susebeek. A compronde cu den caso di Arends, OM ta apela e sentencia di soborno, pero no e falsificacion di firma. Abogado di Arends a confirma cu nan ta apela tambe pero e parti di estafa, hunto cu e otronan cu tambe a apela e parti aki. Cu esaki, si corte bay na nan fabor, por reduci e castigonan obteni, considerablemente.