Hulanda no ta dispuesto pa duna interes abou pa otro debenan di Aruba

DEN HAAG – Hulanda no ta dispuesto pa duna Aruba interes privilegia riba otro debenan cu e por tin of otro interes riba debe cu no ta relaciona cu Covid19. Asina secretario di estado Hulandes Alexandra van Huffelen a bisa riba e declaracion publico di minister Ursell Arends di siman pasa. E mandatario di Aruba siman pasa a manda un articulo pa publicacion unda cu e ta bisa cu Aruba kier claridad di Hulanda pa e situacion di debe, pasobra. Den esaki e mandatario di Aruba ta splica cu e kier sa si Hulanda ta dispuesto pa duna interes abou tambe pa e otro debenan cu Aruba tin. Pasobra cu e ayudo di duna interes abou pa solamente e debe di Covid, no ta yuda Aruba realmente. Esaki pasobra esey ta yuda spaar ‘solamente’ 30 miyon,  pero Aruba tin 250 miyon na otro interes pa paga y pesey ta puntra Hulanda (via prensa) si Hulanda ta dispuesto pa yuda cu esaki tambe. 

HULANDA NO A TENDE NADA

E mandatario di Hulanda, ora cu e la haya e pregunta, a bisa cu e mes no a haya e propuesta aki presenta ‘oficialmente’. De hecho e no a haya un propuesta mes di Aruba riba e RAFt. Asina mes, e la dicidi di comenta riba e pregunta ‘hipotetico’.”No. Esey ta un di e cosnan, te awor mi no a haya e propuesta ey, pero loke e minister ta puntra, ta pa tur debe cu Aruba tin, si mi a compronde bon, tur debe cu Aruba tin, pues tambe cu otro partido fuera di Hulanda, pa laga Hulanda tuma esaki tambe y seguidamente duna un interes abou riba esey tambe” van Huffelen a bisa. E ta conciente cu ta trata di biyones di debe cu Aruba ta papia di dje, y a menciona mas of menos 5 biyon florin. “Hulanda sigur no ta dispuesto pa esey, y sigur no si ainda no tin deal traha riba e prestamonan actual (di Covid:red)!”. Pues e mandatario ta hopi cla, bisando cu mientras cu Aruba no a ni duna un propuesta of cera un acuerdo pa refinanciamento di e debe di Covid19, Aruba ta sugeri pa Hulanda aplica e interes abou pa debenan otro tambe. Y riba esey, sra van Huffelen a duna un rotundo no. 

LESA DEN MEDIA

E mandatario Hulandes tambe no ta contento cu e tin cu lesa e tipo di noticia aki den prensa, y ta sigui tur loke ta sosode na Aruba, tanto loke cu politico y gobierno ta bisa riba e isla. E ta bisa tambe di ta tende comentario di gremionan comercial (sector comercial) ta pidi cu ta pa gobierno firma e RAFt pa caba, pasobra ta den interes di Aruba y ta crea stabilidad y claridad. Por scucha e contesta di Van Huffelen AKI.