Segun premier Wever, gobierno a haci un propuesta na Hulanda

ORANJESTAD – Aruba a haci un propuesta cu ta wordo descuti riba dje na e momentonan aki. Asina gobierno di Aruba a bisa den un articulo cu su titulo ta referi originalmente na e entrega di presupuesto 2024. Tabata na final di e comunicado riba e tema di entrega di presupuesto 2024, gobierno a añadi na final cu nan ‘ta sigui den negosacion cu Hulanda pa refinancia e debe di Covid”. No ta cla pa Noticiacla.com si esaki kier men cu e propuesta cu nan a entrega, ta esun cu te cu ayera ainda Hulanda no a ricibi. Den e programa di Noticiacla LIVE diahuebs atardi cu secretario di estado Hulandes Alexandra van Huffelen, e la confirma cu e no a haya nada ainda. Y si no a haya nada pa awe, esey kier men cu Aruba pa e prome aña(nan) tin cu paga e debe cu interes halto.  

PROPUESTA Y YEGA NA PALABRACION

Loke ta confundi, ta cu den un parti gobierno ta bisa cu e la entrega un propuesta, y despues ta bisa cu ‘mester yega na un palabracion con lo bay yega na un areglo nobo di pago cu Hulanda. “Aruba no tin placa pa paga e debe aki y mester yega na palabracionnan con lo bay yega na un areglo nobo di pago cu Hulanda” e mandatario a bisa diabierna den un comunicado. Por ta cu e ta nifica cu awor cu a entrega ‘un propuesta’, (no sa cua propuesta:red) Hulanda mester check si e ta bay di acuerdo cune. 

COMBERSACION TA BAYENDO BON

“E conversacionnan ta bayendo bon. Nos ta papiando riba alternativanan. Aruba a haci un propuesta cu ta wordo descuti riba dje na e momentonan aki. Otro siman, Gobierno lo ta den Parlamento un biaha mas pa duna mas informacion” e mandatario a bisa. “Mi ta pidi tur hende pa keda trankil. Nos tin un Gobierno cu ta traha serio pa nos pais. Pa loke ta e debe di Covid, Gobierno ta sigui na mesa cu Hulanda. Gobierno su prioridad ta bienestar di e comunidad, y ta traha cu alma y curason pa logra yega na e miho solucion pa e pueblo di Aruba”, Prome Minister a finalisa bisando. Noticiacla no a logra confirma cu Hulanda, si enberdad e propuesta cu Aruba ta papia di dje, ta esun cu Hulanda tabata warda ainda te cu diahuebs atardi.