Van Huffelen: Hulanda kier RAFt pa Aruba pa evita cu por haci cambio na dje unilateralmente

DEN HAAG – Mientras cu gobierno di Aruba e siman aki a bisa cu Hulanda no kier duna motibo pakico nan ta exigi un RAFt riba un LAFt, y mas specifico, e motibo huridico technico, awe mainta e secretario di estado Hulandes Alexandra van Huffelen a bisa Noticiacla.com cu e motibo ta simple y cu esey ta cu den un RAFT, no por haci cambio unilateral. Ora cu a puntra e mandatario cu pakico Hulanda no ta acepta e versionan adapta di un LAFt manera cu Aruba a ofrece, cumpliendo asina toch cu e exigencianan di Hulanda pa loke ta supervision, Van Huffelen a bisa cu ta simple tambe, pasobra cu e LAFT ta un landsverordening. Cu otro palabra, bo por adapta e ley con cu bo kier, cu cua forma cu ta, pero e ta keda un Landsverordening, cu ta pone cu Parlamento di Aruba p.e. por cambia sin cu e mester aprobacion di otro partido. Y ta ey Hulanda su dolor ta cu Aruba, ya cu den pasado caba, ora cu dos parlamentario e tempo ey, Adi Thijsen y Rocco Tjon a entrega un amienda pa adapta e ley di LAFt e tempo ey, y cu a keda acepta, Hulanda a tuma Aruba hopi na malo y e malcontento ey ta awe e motibo, confirma na noticiacla pa e mesun mandatario, pakico tin tanto insistencia di Hulanda pa Aruba firma un RAFT y no un LAFt adapta.