Segun van Huffelen den carta na Tweede Kamer, Aruba ta habri pa Rijkswet RAFT toch

DEN HAAG – ‘Aruba toch ta habri pa implementacion di un Rijkswet (financieel Toezicht:red)’ ta loke secretario di estado Hulandes Alexandra van Huffelen a bisa presidente di Tweede Kamer den un carta awe diabierna mainta. Esaki ta interesante mirando cu e siman aki ainda premier Wever Croes a bisa Parlamento di Aruba cu gobierno di Aruba ta para banda di Parlamento den sentido cu Aruba no kier un RAFT (ley di Reino pa supervision financiero) pero un LAFT (ley local pa supervision financiero). Pues e prome mandatario ta bisa un cos na Aruba y otro cos na Hulanda. Mes momento, mester bisa cu Aruba, mirando cu no tin salida, a dicidi di manda varios concepto di ley di Reino cu e lo por haya su mes aden eventualmente, pero tur a keda rechasa pa Hulanda. Esaki pasobra Hulanda ta insisti cu e kier esun cu Aruba a aproba for di comienso, pero awor kier hala atras. Pero aki tambe tin un problema, pasobra den e mesun carta di Van Huffelen, e ta bisa Tweede Kamer cu ‘momentaneamente, Hulanda no a ricibi ningun proposicion di Aruba, y como tal no a yega a un acuerdo gubernamental riba un Rijkswet’. Pues aki tambe tin dos version ta coriendo entre Aruba y Hulanda. 

E CONDICION DI PRESTAMO

Mirando e situacion,  Van Huffelen ta ofrece Aruba e prestamo contra entre 6-8% di interes. Por lesa a e carta completo AKI.