Diamars Premier Wever Croes ta duna ‘update’ di situacion di RAFt na Parlamento

ORANJESTAD – Diamars mainta Prome Minister Evelyn Wever Croes lo duna cara den Parlamento di Aruba riba e situacion actual di e ley di Reino conoci como RAFt, cu Hulanda ta exigi Aruba firma pa e por haya un miho deal pa refinancia e debe di Covid19, prome cu 10 di October 2023. Manera ta conoci, Gobierno di Aruba ta contra esaki y ta sostene e punto di Parlamento den su punto unda cu e no kier pa firma e RAFt, argumentando cu e ta mina autoridad di Parlamento y ta hasta hacie obsolete. Esaki no obstante cu na prome instante Aruba a firma y bay di acuerdo cu Hulanda. Aruba ta bisa cu a haci esaki cu lomba contra muraya e tempo ey, pa por a haya ayudo financiero ora cu pandemia a dal Aruba na 2020. Pero mientrastanto cos a cambia y awor gobierno di Aruba ta sostene Parlamento den su ‘protesta’. 

HULANDA TA EXIGI

Tabata algun tempo patras den un entrevista cu Noticiacla a sostene cu e secretario di estado Hulandes Alexandra van Huffelen, cu a splica un biaha mas cu no tin ningun otro alternativa cu no ta e version actual di e RAFt, y cu Aruba ta haya te cu October pa firma esaki. Riba e pregunta cu si tin un otro alternativa cu no ta RAFt, si Hulanda lo ta dispuesto pa entretene e idea, e mandatario tabata hopi directo y a bisa ‘no’. Y cu e unico opcion, tabata y ta keda RAFt y cu e ta spera cu Aruba yega na un consensus y firma e ley aki. Di otro forma, Hulanda ta haye obliga di nenga e ayudo di interes abou ora di pidi prestamo. Aruba (contrario na St Maarten y Corsou), ta e unico di e tres islanan cu por fia riba mercado internacional, pero esaki lo bira cu interes halto. Esaki por costa Aruba miyones extra pa hopi aña, y a calcula cu esaki por ta entre 9 pa 10 miyon extra pa aña. 

DUNA CUENTAE intencion ta pa diamars awor e prome mandatario actualisa Parlamento riba e situaciona actual, y informa asina Parlamento di unda ta para. No ta spera mucho cambio, sino mas bien, lo informa Parlamento di e combersacionan cu ta andando entre Aruba y Hulanda riba e tema. Mucho cos no a cambia, pues mucho cos no lo wordo bisa diferente. Mas bien e lo por bira un Plataforma cu politiconan parlamentario lo usa pa hiba ‘politica’ partidista, pero cu na final lo no yuda na nada. E punto ta si Parlamento lo ta dispuesto pa cambia di postura y of no y si nan lo logra yega na un acuerdo prome cu e mandatario Hulandes bolbe aki banda. E mandatario Hulandes ultimo biaha a bisa Noticiacla cu e lo ta bek aki banda fin di September proximo. Ta spera cu pa e tempo ey, tin algo mas concreto.