Siman ta habri cu 3 tormenta cu nomber den Caribe y laman Alantico

MIAMI – E siman aki ta habri cu no menos cu 3 tormenta cu nomber den laman Caribe y Atlantico. Ta trata di Tormenta Emily, Franklin y Gert, di cual Gert ta esun cu menos potencial. E no ta algo inusual, pasobra e la yega di sosode den pasado caba, pero ta confirma e intensidad di e temporada di horcan 2023. Fuera di e tres tormentanan cu nomber, tin 2 otro sistemanan tropical cu ta vigilando di cerca. Pues un siman climatico hopi activo pa e temporada di horcan 2023. Manera ta conoci, siman pasa Noticiacla a raporta e actualisacion di e pronostico di e temporada, unda cu a aumenta e intensidad di tormenta y esaki ta sosodiendo tambe, mirando e cambionan climatologico, primordialmente e calor inmenso. E tormentanan actual no tin efecto directo pa Aruba pero si otro teritorionan den Caribe, manera Hispañola y Puerto Rico. Ta mucho tempran pa duna un bista di e otro tormentanan aunke ta premira cu e tormenta Gert lo no tin un bida mucho largo.