Segun ELMAR, situacion di coriente ta sigui delicado pa dos luna mas

ORANJESTAD – E situacion di coriente ta sigui delicado, y e comunidad di Aruba a wordo pidi pa un poco mas pasenshi pasobra ta te cu 20 di October proximo, ora cu caba cu e trabounan grandi na e onderstacion nobo keda cla. Esaki ta entre otro e mensahe cu a sali di e conferencia di prensa di e gerencia diaranson mainta, unda cu a purba splica e situacion actual di e interupcionan continuo cu Aruba ta experenciando ultimo tempo. Tabata e director Anthony Irausquin, Tico Koolman, hefe di departamento technico y Urvin Goeloe cu ta un di e opzichternan di trabou di instalacion di kabel riba caya, cu a hiba palabra durante e conferencia. Cada uno a splica un parti di e situacion pa asina haya e impresion completo di kico ta pasando cu tanto interupcion di coriente ultimo tempo. 

MOTIBONAN DI INTERUPCION

Entre e motibonan duna di interupcion, sr Irausquin a splica cu storing ta keda un issue, y cu esaki lo sigui pasa y cu e motibo ta diferente. Entre nan, a duna cu bestia ta pasa riba waya (boa), accidente di auto unda cu ta dal palo di luz y causa interupcion den coriente, te na mantenimiento di trafohuisnan durante cual por tin situacion cu ta keda delicado causando interupcion di coriente. Sr Irausquin a  duna un splicacion detaya di e trabounan cu ta tumando lugar pa keda cla cu un trafo huis nobo, pero cu debi na retraso di e.o. piesa for di exterior (Suiza), y kibramento inespera di kabel di 60 volt, cu esaki a core un retraso mas grandi cu a premira y cu awor ta trahando ariba pa keda cla te aki 2 luna. Fuera di esey, for di tempo di pandemia, a haya un scarsedad pa haya trafo di afo, pero cu Aruba tabata riba un lista di espera di 2 aña. Ademas, e cantididad di palo di luz cu tabata wordo kibra door di accidente, a bira asina hopi cu dado momento, no tabatin suficiente. Tur esaki a pone cu segun sr Irausquin, consecuentemente e situacion di problema cu coriente 'lo sigui sosode', te ora cu keda cla cu e trabounan di e onderstation nobo na Sabana Blanco. 

FAYO CONTRATISTA

E ultimo interupcion tabata ora cu un contratista trahando riba e proyecto mes a bora en kabel grandi di 60 volts na e proyecto cu a pone cu esaki a causa daño considerable cu mester trece hende di Hulanda pa yuda traha riba esaki ya cu na Aruba no tin persona certifica pa e tipo di trabou grandi ey. A mustra tambe cu ni maske cu tin control, incluyendo cu hende experencia den cercania, y cu ta pone e personal mas cualifica pa haci e trabou di boramento door di contratista, na fin di dia, ta keda e homber cu e pik cu ta traha, cu por haci e fayo. Y a sigura cu no ta cu ELMAR ta sconde tras di fayo, sino cu tin factornan cu ta pone cu cosnan ta sosode manera cu e ta sosode.

TRABOU DELICADO

A splica tambe cu e trabounan di reparacion y coreccion ta trabounan delicado, unda cu condicion den cual ta haci esaki, hopi biaha ta fastioso, y ni maske cuanto ta tene cuidou, cosnan por pasa toch. E factor solo, calor, cansansio ta hunga un rol ora cu traha riba cabel y esaki por tin su consecuencianan. 

POSITIVO

E positivo di e situacion segun NV Elmar, ta cu ta trahando cu nan smartgrid cu ta pone cu por identifica e problemanan mas liher cu antes y cu esey ta pone cu por drecha e sistema tambe mucho mas liher. Esey no ta kita afo cu ta pidi comprension y pa comunidad ta mas responsabel ora di p.e. core auto, pa evita cu ta termina cu accidente causando cu ta haya accidente contra p.e. un palo di luz, cu na su turno, ta resulta den posibel interupcion di coriente.