Minister: OM na Corsou por persigui esun cu su Pitbull haci daño na otro, penalmente

WILLEMSTAD - Minister di hustisia Shalten Hato a manda un mensahe bon kla ku hustisia lo aktua severamente kontra di tur ku nan kachó peligroso òf Pitbull hasi daño na sea otro hende òf otro bestia. Esaki por trese kuné entre otro kaso penal tambe.

E ‘landsverordening gevaarlijk honden’ a originá dor ku 16 aña pasa, dos kachó a mata un yu di 5 aña kruelmente. E lei ta indiká ku komo peligroso kachó Pitbull, komo e ta impredesibel, ya ku e ta traha dor di hende i ora e morde i su kak ta dal sera e no ta habri bèk i ta move su kabes di robes pa drecha. Ta resa mester resa pa nada no pasa bu i e lòs.

E lei ta indiká ku no ta aseptá mas importashon di e kachó aki, i tur ku tei mester wòrdu di chip, kurá di kas mester ta hermétikamente será i tambe mester sterilisá e kachónan aki.

Segun minister Hato den deklarashon, resientemente loke a sali ta ku 3 Pitbull a morde un señora malamente i asina ku un kachó peligroso den e kaso aki un Pitbull morde un persona, mesora lei ta drenta na vigor. Konforme e liña di maneho di Ministerio Públiko, riba nan instrukshon, e kachó ta wòrdu matá. Kuerpo polisial den e kaso asina aki mesora ta drenta akshon i bai e insidente i einan ta tuma e kachó den beslag i riba òrdu di OM ta laga mata e animal.

Pero segun minister Hato no ta tur kachó ta keda tratá di e mesun forma manera e Pitbull. Den kaso ku un otro tipo di kachó morde un persona, mester bin un investigashon, kaminda tin di yega na un rapòrt di eksperto i finalmente ta wes ta dikta si tin di mata e kachó. Konsekuentemente no ta OM ta duna instrukshon pa mata pero riba òrdu di wes.

“Loke a pasa djabièrnè 11 di ougùstùs ta sumamente lamentabel i kadena hudisial kompleto a keda  di shòk”, segun minister Hato. I tin algun opshon den kasonan asin’aki;

E doñonan di e kachó ta responsabel i tin dos paso ku por tuma lugá i un di nan ta ku esun mord’é por entamá un kaso sivil kontra di doño di kachó pa e haña su daño ku el a sufri. Por pensa den direkshon ku debí na e mordénan e hende no por traha òf e mester di hende pa kuid’é. E gastunan aki por keda poné riba e doño (nan) di e kachó.

Otro opshon ta ku OM por start kaso penal i sigur den un kaso asina aki por hasié kontra di e doñonan di e kachó a base di artíkulo 3.2 di ‘wetboek strafrecht’. I den un kaso penal e víktima ku a keda mord’é por partisipá i pidi daño perhuisio.

Relashoná ku e asuntu ku Hit Team no ta funshoná, minister Hato a splika ku promé ku reorganisashon di kuerpo polisial, tabatin e tim ei pero awor ta e departamentu di VVC ta atendé. I sigur si ta trata insidentenan kaminda hendenan ta keda malamente morde, e kasonan aki ta keda atendé i sigur bou di guia i supervishon di OM. NOTA: Texto ta scirbi den Papiamento fonetico di Corsou. NOTA: E potret di e pitbull no ta esun cu ta relata na e raportahe aki sino ta solamente como ilustracion general.